> Kreyòl > Mario Andrésol : nouvo direktè Polis nasyonal la

Mario Andrésol : nouvo direktè Polis nasyonal la

Publié le lundi 18 juillet 2005

Ansyen komisè divizyonè Mario Andrésol pral ranplase Léon Charles kòm nouvo direktè jeneral Polis nasyonal Dayiti (PNH). Dapre enfòmasyon radyo Kiskeya jwenn nan bon ti mamit, yon arete prezidansyèl ta dwe soti mèkredi pou pita pou fè nominasyon sa a ofisyèl.

Léon Charles ki te rive alatèt PNH, nan mwad mas 2004 apre Aristide te fin tonbe, aksepte renmèt demisyon li.

Nouvo direktè a ki se ansyen kaptenn defen lame Dayiti (FAd’H), te direktè santral polis jidisyè (DCPJ) epi komisè Petyonvil, nan moman li te nan enstitisyon an. Nan lanne 2001, Andrésol te oblije kraze rak al kache Ozetazini, apre rejim Lavalas la te fin revoke l, mete l nan prizon ak akizasyon konplo koudeta sou do l.

Selon moun ki pratike li, Mario Andrésol se yon moun ki plis renmen mennen operasyon sou teren olye pou l chita dèyè biwo.

Kanta pou direktè ki prale a, Léon Charles, li dwe vin minis konseye, reskonsab dosye sekirite nan Anbasad Dayiti Wachintonn.