> Kreyòl > Sendomeng pimpe 56 ayisyen tounen ; resansman pou etranje

Sendomeng pimpe 56 ayisyen tounen ; resansman pou etranje

Publié le mardi 19 juillet 2005

Otorite dominiken yo pimpe 56 ayisyen san papye tounen lakay yo madi, apre yo te fin arete yo nan pwovens Valverde Mao, nan nòdwès Sendomeng. Jeneral Pedro Càceres, kòmandan zòn fwontyè a, fè konnen yo te bare ayisyen sa yo ap chache janbe nan kondisyon ilegal nan Sanntyago, dezyèm vil peyi a ki twouve l nan Nò.

Apre yo te fin fèmen moun sa yo nan 4 miray, yo te mete yo aladispozisyon otorite imigrasyon yo, pou yo te kapab anbake yo pou Ayiti.

Gouvèlman Leonel Fernàndez la anonse li p’ap kanpe sou operasyon voye ayisyen tounen nan peyi a ; menm si li pran prekosyon pou l di l’ap respekte dwa fondalnatal yo e li p’ap ranmase yo pa bann pa pakèt ankò.

Minis enteryè ak lapolis dominiken an, Franklin Almeyda Rancier, ki fèk monte alatèt konsèy nasyonal migrasyon an deklare lendi Repiblik Dominikèn ap bay yon seri espesyalis fè yon resansman rapid pou li, pou l ka konnen ki kantite etranje k’ap viv lakay li nan kondisyon nòmal, ki valè tou ki ilegal. Mesye Almeyda ki presize ankèt la ap konsènen tout etranje alawonnbadè, kwè depi yo gen tout enfòmasyon sa yo nan men yo, y’ap kapab devlope yon politik pou Sendomeng nan domèn imigrasyon.