> Kreyòl > Pè Jean-Juste devan lajistis pou akizasyon vyolans

Pè Jean-Juste devan lajistis pou akizasyon vyolans

Li mande mobilizasyon pezib pou Aristide tounen

Publié le mercredi 20 juillet 2005

Pè Gérard Jean-Juste, lidè patizan malouk Aristide yo, pase 2 zèdtan mèkredi nan kabinè enstriksyon Palèd jistis Pòtoprens ap reponn kesyon jij Jean Pérez Paul, sou akizasyon ki tonbe sou dol kòm moun ki ta kanpe dèyè plan operasyon kraze brize ki ap aplike nan peyi a. Kire pawas Sent Klè a, nan zòn Ti Plas Kazo (nan nò Pòtoprens ) fè konnen nan mikwo radyo Kiskeya, li pa nan ankenn aktivite vyolans.

2 avoka li te akonpaye l nan Palèd jistis la : Mèt Mario Joseph ak Mèt William Quigley, yon avoka ameriken.

Gérard Jean-Juste deklare li pare pou l soutni "tout mouvman mobilizasyon pezib pou Jean-Bertrand Aristide tounen nan peyi a" ; san l pat kapab di ki mobilizasyon san vyolans pati sa a fè deja. Pou li menm, prezans ansyen diktatè a ann Ayiti nesesè si pou peyi a tounen sou ray konstitisyon an. Pè a ki mande pou san pitit pèp la sispann koule pou granmesi, fè konnen tou si sa l rele vyolans anwo a pa sispann, sa anba a p’ap janm fini.

Yon lòt pa, pè Lavalas la deklare kare bare se blan yo ki kòmanse afè kidnaping nan ann Ayiti, lè yo te anbake Aristide pou legzil, 29 fevriye 2004. An menm tan tou, li di Lavalas pa gen anyen pou l wè nan pil kidnaping k’ap fèt yo. Li pwofite kondane sasinay Jacques Roche la, pandan l fè konnen viktim nan se ta yon fanmi l de lwen.

Vandredi pase, otorite ameriken yo te kenbe Jean-Juste pandan kèk minit nan ayopò Miyami an, pandan l ta pral pran avyon pou l te rantre ann Ayiti. Rive l te rive Pòtoprens nan ayopò Toussaint Louverture, pè a te oblije reponn kesyon lapolis pandan plis pase 1èdtan, sou lajan ak zam li ta pote soti lòtbò pou distribye pou ankouraje flanm vyolans la monte opliwodegre.