> Kreyòl > Ansyen Prezidan, istoryen, entèlektyèl wòdpote Leslie Manigat mouri

Ayiti-Politik-Dèy

Ansyen Prezidan, istoryen, entèlektyèl wòdpote Leslie Manigat mouri

Li pati a 83 zan, apre yon long peryòd maladi

Publié le samedi 28 juin 2014

Gwo dèy pou Ayiti ki pèdi yonn nan gwo pitit li yo, ansyen Prezidan demokrat kretyen Leslie Manigat ki mouri vè 4è maten vandredi a lakay li, Laplèn, anba yon long maladi ki te antre sou li depi anviwon 3zan e li te sipòte ak anpil kouraj.

Leslie François Manigat, ki te gen 83 zan, ap kouri sou 84, te fèt 16 out 1930 nan Pòtoprens, nan yon fanmi ki gen rasin li nan Fò Liberté, nan Nòdès peyi a. Selon madanm li, sekretè jeneral Rasanbleman democrat nasyonal pwogresis yo (RDNP) epi ansyèn kandidat alaprezidans Mirlande Hyppolite Manigat, pwofesè a fè dènye vwayaj la nan trankilite malgre li te atrape maladi chikungunya a dènye jou sa yo.

Defen an tout moun rekonèt kòm yonn nan pi gwo entelektuèl ayisyen pou tout 20e syèk la, se te yon gran istoryen, politològ, pwofesè inivèsite ki te pase 4 mwa sèlman alatèt peyi a soti 7 fevriye pou rive 20 jen 1988. Apre l te monte nan eleksyon konteste 17 janvye menm ane a, prensipal kandida yo te bòykote poutèt eleksyon lub e demokratik 29 novanm 1987 yo te fini nan yon masak lame ak makout yo te fè nan riyèl Vayan, mesye Manigat ta pral pèdi pouvwa a nan yon koudeta jeneral Henry Namphy te ba li.

Malgre prezidans lidè e fondatè RDNP a te kout, anpil sitwayen te regrèt dèske eksperyans politik sa a pat kontinye pou l te mete Ayiti sou chemen pwogrè ak devlopman paske Leslie Manigat te monte yon bèl ekip gouvènmantal, konpetan e onèt, ki te kòmanse aplike yon politik modèn, ak vizyon nasyonalis e pwogresis.

Apre yo te mete kandidati l sou kote nan eleksyon 1990 yo, dirijan democrat kretyen an te prezante nan eleksyon prezidansyèl 2006 yo anfas yon lòt ansyen chef leta, René Préval. Kandida sektè Lavalas la ki te fini premye tou a ak 48% vwa yo devan Manigat, kit e a anviwon 13%, ta pral ranpòte laviktwa gras ak entèvansyon kominote entènasyonal la ki pat vle pou te gen yon dezyèm tou. Desepsyon eleksyon sa a te pote pou li, te pouse ansyen prezidan an retire kò l nan tèt pati li te fonde a, an 1979, nan Karakas, kapital Venezuela, pandan yon egzil plis pase 20 an sou diktati François ak Jean-Claude Duvalier a.

Leslie François Manigat, ansyen elèv St-Louis de Gonzague, pitit pitit jeneral François St-Surin Manigat, yonn nan gran pèsonaj politik dezyèm mwatye 19e syèk la, te fonde, an 1958, lekòl Hautes Etudes Internationales, ki ta pral tounen Institut national administration, gestion ak hautes études internationales (INAGHEI), ki nan Inivèsite leta a. Avèk kòlèg li Pradel Pompilus, Pierre Riché, Jean-Claude e Max Chancy li te fonde tou Centre d’études secondaires, yonn nan pi gwo lekòl klasik ki te parèt nan Pòtoprens, nan ane 60.

Leslie Manigat, ki te yon briyan entèlektuèl e chèchè, te yon konferansye entènasyonal epi pwofesè nan gwo inivèsite tankou John’s Hopkins ak Yale Ozetazini, Institut d’études politiques de Paris, Inivèsite West Indies nan Trinidad Tobago ak nan Inivèsite Simon Bolivar, nan Karakas.

Pami anpil nan publikasyon defen an, nou kapab site L’Amérique latine au XXe siècle, 1889-1929, nan edisyon Seuil, an pluzyeur volum Eventail d’histoire vivante, la crise de dépérissement de la société traditionnelle haïtienne, Le Délicat Problème de la Critique Historique : les sentiments de Pétion et de Boyer vis-à-vis de l’indépendance nationale dans la conjoncture de 1809-1814 », « La Révolution haïtienne de 1843 : Essai d’analyse historique d’une conjoncture de crise », « L’œuvre politique et administrative de L. F. Salomon, le contemporain capital du 19ème siècle haïtien », ak La Révolution de 1946. spp/Radio Kiskeya