> Kreyòl > Pè Gérard Jean-Juste anba men lapolis

Pè Gérard Jean-Juste anba men lapolis

Gwo pwotestasyon kont li nan antèman Jacques Roche

Publié le vendredi 22 juillet 2005

Lapolis arete pè Gérard Jean-Juste, lidè patizan anjandre Jean-Bertrand Aristide yo, pandan li t’ap soti nan mitan jounen jedi a, nan legliz Sen Pyè Petyonvil, kote antèman jounalis, powèt Jacques Roche t’ap chante an prezans plizyè milye moun an kòlè. Pè Lavalas la ki dapre tout enfòmasyon an kontak toutan avèk Aristide, te debake ak soutàn li sou li nòmalman pou l te al chante antèman defen an li te prezante kòm fanmi l.

Prezans li te lakòz yon gwo wounou wounou nan mitan asistans la, ki t’ap plede rele anmwe ansasen ! epi mande Gérard Jean-Juste pou kisa li pat sèvi ak relasyon li genyen ak kidnapè yo, pou l te fè yo lage moun li te konsidere kòm fanmi l lan. Pè a te oblije abrite l nan sakristi legliz la. Pandan l t’ap soti sou pwoteksyon MINISTA pou moun ki te vin nan antèman an pat atake l, Jean-Juste te tou tonbe sou kontwòl Polis nasyonal la ki te al fèmen l nan komisarya Petyonvil la, anvan yo te desann nan komisarya Pòtoprens la avèk li.

Kire pawas Sent Klè a (nan nò kapital la) genyen sou do l akizasyon moun k’ap ankouraje vyolans, chèf pwopagann pou kidnaping. Li genyen tou moun nan popilasyon an ki lonje dwèt sou li kòm yonn nan pi gwo reskonsab zak vyolans ki ap fèt san rete nan peyi a.

Mèkredi, apre l te fin reponn kesyon jij enstriksyon Jean-Pérez Paul sou wòl li ta kapab jwe nan zak teoris k’ap fèt yo, Pè Jean-Juste te fè konnen li kanpe rèd dèyè tout mouvman pezib ki gen kòm objektif fè Aristide tounen ann ayiti.

Ann oktòb 2004, pè Lavalas la te deja pran yon tou prizon ak akizasyon vyolans politik sou do l. Men, presyon etranje, espesyalman evèk ameriken yo, te fòse otorite yo lage l apre yon mwa edmi.