> Kreyòl > Eleksyon : jounen nasyonal enskripsyon, mobilizasyon

Eleksyon : jounen nasyonal enskripsyon, mobilizasyon

Publié le samedi 23 juillet 2005

Konsèy elektoral pwovizwa a (KEP) anonse li pran tout dispozisyon pou l mobilize maksimòm sitwayen, ankouraje yo al fè kat elektoral yo nan okazyon jounen nasyonal enskripsyon an ki ap fèt dimanch, nan tout 10 depatman peyi a. Nan Pòtoprens, randevou a kase nan yon sant enskripsyon ki tabli sou plas Jeremi kote plizyè djaz tankou Gracia Delva/Mass Konpa ak Brothers Posse dwe al mete anbyans, animasyon san pran souf. Dwe genyen anbyans, aktivite kiltirèl tou nan vil tankou Okap Ayisyen (nan Nò), nan Wanament (nan Nòdès), nan Gonayiv (nan Latibonit) ak nan Miragwàn (nan Nip).

Dapre konseye Patrick Féquière, responsab operasyon elektoral yo, jounen nasyonal enskripsyon an se yon gwo okazyon pou yon bann moun al fè kat idantifikasyon nasyonal yo, ki dwe pèmèt yo ranpli divès fòmalite ak mennen aktivite tankou : al labank, fè lisans, pèmi pou pote zam, pran patant, fè kat didantite nan DGI, fè paspò, achte ak vann byen kay notè.

Mesye Féquière ki anjeneral toujou ap kritike KEP a, presize selon tout enfòmasyon ki disponib, pou rive 17 jiyè, te gen 531 mil 821 moun ki te enskri. Jounen Dimanch la ta dwe pèmèt Konsèy elektoral la depase 780 mil grandèt majè ki ranpli fòmalite pou yo jwenn kat ki ap pèmèt yo jete bilten, fè chwa politik yo, nan eleksyon ki fikse ann Ayiti pou fen ane a.

Pou jounen enskripsyon nasyonal la ka byen pase, KEP a antann li ak TELEKO pou mete yon tep sou tout telefòn konpayi an, depi gen yon apèl ki pati, ou tande yon mesaj pou ankouraje w al enskri. Gen moun ki kontan inisyativ sa a anpil, konsa tou gen lòt ki sezi epi estomake tankou ansyen konseye elektoral an 1990, Jean Casimir,ansyen anbasadè Dayiti nan OEA. Li mande pou TELEKO wetire tep li a paske li pa gendwa fòse kliyan l yo tande yon mesaj, si yo pa vle.

Pandan operasyon enskripsyon yo ap pèdi tan, se konsa tou anpil moun konstate se pa 2 sitwayen ak sitwayèn ki kanpe an ran chak jou, devan biwo enskripsyon yo, pou al fè kat yo. Jiskaprezan, responsab yo prevwa pou enskripsyon yo fèmen 9 dawout.