> Kreyòl > Jounen nasyonal enskripsyon : siksè total

Jounen nasyonal enskripsyon : siksè total

Plizyè milye moun enskri pandan yon sèl jounen an, pou pwochèn eleksyon yo

Publié le dimanche 24 juillet 2005

Konsèy Elektoral Pwovizwa a (KEP) make yon gwo pwen nan okazyon jounen nasyonal enskripsyon an, ki pèmèt plizyè milye moun enskri dimanch, nan kat kwen peyi a. Nan tout 10 depatman yo, se te mobilizasyon totalkapital pandan tout jounen an ak yon rado sitwayen, fanm kou gason, ki te reponn prezan pou al fè kat elektoral yo, kat didantite nasyonal la ki dwe itil tout kominote a.

Nan Pòtoprens, pi gwo sant enskripsyon an te sou plas Jeremi (nan sid kapital la). La sèlman, plizyè santèn moun anrejistre pou yo kapab resevwa kat yo nan yon mwa konsa. Anbyans mizik, blag, koregrafi te akonpaye operasyon enskripsyon yo ki dewoule san okenn pwoblèm sekirite. Sitwayen yo fè konnen rezon ki fè yo deplase an mas, se paske yo vle vote nan finisman ane a pou chanjman, pou kandida ki montre yo gen kapasite pou yo jere Ayiti yon lòt jan. Yo pwofite voye yon kout rèl bay lòt sitwayen parèy yo ki pokò mete devwa yo opwòp, pou yo kouri al fè kat yo prese prese.

Menm si kandida yo, lidè politik yo t’ap fè lera, nan sant enskripsyon zòn tankou Petyonvil, Kafou, ling sitwayen yo te men longè menm jan ak nan diferan vil pwovens.

Konseye elektoral Patrick Féquière ki te prezan sou Plas Jeremi, deklare ta dwe gen plis pase 800 mil moun ki enskri antou nan peyi a, apre jounen nasyonal enskripsyon an, ki se yon inisyativ pou bay aktivite preparasyon eleksyon yo yon bon bourad. Li pwofite anonse enskripsyon yo ap dewoule nan seksyon kominal yo nan mwad dawout la pandan KEP a ap travay pou, nan finisman mwad jiyè a, yon milyon moun gentan enskri.

Akòz reta ki genyen nan kalandriye elektoral la, anpil moun ap tann yon desizyon bò kote KEP a pou l pwolonje peryòd enskripsyon yo.