> Kreyòl > Inyon Ewopeyèn pa gen pwojè fonn Ayiti ak Sendomeng

Inyon Ewopeyèn pa gen pwojè fonn Ayiti ak Sendomeng

Publié le lundi 25 juillet 2005

Reprezantan Inyon Ewopeyèn nan nan Santo Domingo, anbasadè Dino Sinagallia, demanti lendi tout bri ki ap kouri sou desizyon kominote a ta pran, pou fè Ayiti ak Sendomeng fè yon sèl anvan lontan. Diplomat la ki mande kote moun ki ap pale konsa yo bare ak pawòl sa a, fè konnen ni gwoup peyi ki nan Inyon Ewopeyèn yo, ni gwo anplwaye oswa pèsonalite nan kominote a pa janm fè ankenn deklarasyon pou soutni lide marye Ayiti ak Repiblik Dominkèn, ki sou zile Ayiti oubyen Kiskeya a, pou fè yo tounen yon sèl.

Sinagallia ki t’ap patisipe nan emisyon "Aeromundo" sou antèn Color Visiòn, yon chèn televizyon dominikèn, raple Ayiti ak Sendomeng, se 2 peyi granmoun ; yo chak gen enstitisyon pa yo, kilti pa yo, lang pa yo. Li ajoute, Inyon Ewopeyèn, ki rasanble 25 peyi kounyeya, gen pwogram kolaborasyon ak otorite dominiken yo pou konbat lamizè nan peyi a ; men, se pa menm kalte pwogram UE fè ann Ayiti, menm si se toujou nan menm domèn nan.

Yon lòt pa, anbasadè Dino Sinagallia konsidere kòm yon travay moun fou, ankèt Fondasyon pou lapè, yon ONG ameriken ak jounal ameriken Foreign Policy (politik entènasyonal) ki vle fè Sendomeng pase pou yon peyi ki echwe alòske se yon peyi ki pa sispann fè pwogrè. Diplomat la ki te vle bay Prezidan dominiken an Leonel Fernàndez garanti yo avèk li, pwomèt pou Inyon Ewopeyèn denonse klasman sa a, nan tout gwo deba entènasyonal kote li reponn prezan.

Pou fini, reskonsab Inyon Ewopeyèn nan lakay vwazen, anonse gen yon valè 200 milyonn dola vèt kominote a bay pou divès pwojè nan zòn fwontyè Ayiti/Sendomeng nan, tankou 60 milyon pou konstwi yon mache nan vil dominikèn Dajabòn ak tout wout ki dwe soti nan bò pa Ayiti a pou ale nan mache a. Gen lòt chapit nan menm pwojè a ki konsènen anviwonnman an nan zòn fwontyè a.