> Kreyòl > Aktyalite nasyonal la, vandredi 19 out

Ayiti/Enfòmasyon

Aktyalite nasyonal la, vandredi 19 out

Dènye nouvèl yo

Publié le samedi 20 août 2016

Prezidan pwovizwa a, Jocelerme Privert, deklare leta ayisyen pokò okouran ofisyèlman de rapò kote Nasyonzini ta rekonèt responsablite l nan deklanchman epidemi kolera a ann Ayiti, ki lakòz, depi 2010, plis pase 9 mil moun mouri, anviwon 800 mil lòt kontaminen. Chèf leta pou yon ti bout tan an, ki tap patisipe nan inogirasyon yon sou stasyon Elektrisite Dayiti nan Taba, jounen vandredi a, fè konnen li tande enfòmasyon an tou, men lap tann pwochen asanble jeneral Nasyonzini an, ki fikse pou finisman mwad septanm nan, pou l konnen plis sou dosye sa a.


Alatèt Biwo Avoka Entènasyonal yo (BAI), Me Mario Joseph, ki fè pati gwoup ki toujou mobilize pou reklame jistis ak reparasyon pou viktim kolera yo, aplodi rapò Nasyonzini an ki rekonèt se sòlda nepalè Minustah yo ki te antre ak maladi a nan peyi a. Nan yon rankont ak laprès, Me Joseph di gen jefò kap fèt nan dosye kolera a, men li pran enfòmasyon sa yo ak prekosyon. Avoka Viktim yo kritike gouvènman pase yo ki pat janm pran pozisyon an favè popilasyon an. Li mande rejim Jocelerme Privert la pran responsabilite’l.


Prezidan Pwovizwa a, Jocelerme Privert, ki te gen ak li minis travo piblik la, Jacques Evelt Eveillard, inogire jounen vandredi a yon sou stasyon EDH nan Taba. Avèk yon kapasite 48 megawat, izin sa a pral founi popilasyon komin nan ak zòn ozalantou l yo kouran. Travay konstriksyon izin sa a jwenn finansman BID pou yon valè 16. 4 milyonn dola ameriken. Yon konpayi Repiblik Dominikèn ak yon lòt ki an Corée du Sud egzekite travay konstriksyon an pandan 17 mwa. Nan entèvansyon li fè nan sikonstans la, chèf leta a remèsye BID ki finanse pwojè sa a epi mande popilasyon an pote kole ak EDH nan peye bòdwo yo, pou tout moun kapab benefisye plis sèvis.

Nouvèl teknoloji, ki itilize nan izin sa a, dwe pèmèt sèvis entèvansyon Elektrisite Dayiti a aji pi rapid si gen yon pwoblèm sou rezo a, selon direktè jeneral konpayi an, enjenyè Garry Valdemar ak direktè rezo a, Michel Patrick Mathieu. Responsab yo anonse sou stasyon tou nèf sa a pral pote yon amelyorasyon nan distribisyon kouran an nan komin Taba.

Nap sinyale seremoni inogirasyon an dewoule an prezans majistra Taba a, Nice Simon.


Prezidan Konsèy elektoral pwovizwa a, Léopold Berlanger, deklare jounen vandredi a KEP a ap travay a tout fòs pou l respekte dat 9 oktòb la ki fikse pou òganize eleksyon yo. Nan yon entèvyou li bay nan moman li tap vizite sant egzamen pou seleksyone sipèvizè elektoral yo, nan Lise Nasyonal Petyonvil la, alatèt KEP a presize konkou pou sipevizè elektoral yo dewoule nan tout 10 depatman peyi a. Li ajoute KEP a angaje l tou nan pwosesis pou l seleksyone manm Biwo vòt yo.

BED lwès 1 an òganize egzamen pou rekrite sipèvizè elektoral yo nan depatman an. Prezidan BED la, Wally Désence, soulinye egzamen sa yo dewoule nan 3 sant ki se Lise Petyonvil la, Lise Fritz Pierre Louis, ak Lise Anacaona Leyogàn. Responsab la deklare konkou a byen dewoule , se sèlman nan Leyogàn yo te anrejistre yon ti reta nan tan pou egzamen yo te kòmanse a. Dekrè elektoral la mansyone tout pyès yon sitwayen bezwen pou l te kapab patisipe nan konkou a.

Sou bò pa yo, plizyè kandida fè konnen egzamen an pat twò difisil. Kèk nan yo di li enpòtan pou responsab yo bay rezilta yo anvan lontan paske dat eleksyon yo prèske rive. Gen lòt patisipan ki felisite KEP a pou jan egzamen yo pase a.

Konkou pou rekrite sipèvizè biwo elektoral pou 3 sikonskripsyon Pòtoprens yo ak Site Solèy dewoule tou nan Lycée Fritz Pierre- Louis.Se bò 11zè edmi egzamen yo ki te prevwa pou 9vè nan maten te kòmanse. Selon Jacillon Barthélémy, yon veteran nan sistèm elektoral la ki se kòdonatè biwo elektoral lwès #1, apre piblikasyon rezilta konkou a,yap tanmen seyans fòmasyon pou sipèvizè yo, jan KEP a vle avanse ak pwosesis elektoral la. Li presize gen anpil kandida, men chak bèk yo gen yon kantite sipèvizè yap gen pou yo chwazi.


Konsèy elektoral pwovizwa a fèmen jounen vandredi a pwosesis pou kandida senatè yo bay lese pase pou makèt bilten vòt yo, pou eleksyon 9 oktòb yo. KEP a resevwa pou dènye jounen an kandida depatman Grandans, Sid, ak Sidès. Direktè rejis elektoral la, Philippe Augustin, anonse KEP a resevwa nan men konpayi Doubaï la, Alghourel, yon kalandriye pwodiksyon ki konfime bilten yo ap pare atan. Nan sans sa a, dat 19 septanm kalandriye elektoral la te fikse a ap respekte. Direktè rejis elektoral la raple operasyon validasyon makèt bilten yo pèmèt kandida yo verifye si foto yo, non yo, ak non pati yo enskri anba banyè yo kòrèk.

Plizyè kandida ki te vin verifye makèt bilten yo fè konnen yo pa remake gwo anomali. Men, Kèk nan yo swete gen plis ekleraj sou foto yo. Ansyen senatè Sid Lavalas la, Pierre Francky Exius, ki kandida pou menm pòs la, anba banyè LAPEH, deklare peyi a ap fè fas ak yon sitiyasyon ekonomik difisil. Nan sans sa a, li swete KEP a òganize bonjan eleksyon pou gen stabilite politik. Plizyè lòt Kandida pou renouvèlman tyè sena a, tankou Jean Patrick Georges pou depatman Grandans anba banyè FREM, Marc André Joseph pou Nò, anba banyè KLE, ak Dr Guibert Bathélemy, pou la Grandans anba banyè Fanmi Lavalas, te tou pwofite bay dizon yo sou fason yo remake pwosesis elektoral la ap vanse.


Depite Kenskòf KID la, Alfredo Antoine Junior, di li pa gen ankenn pwoblèm ak rapò ankèt komisyon etik ak antikoripsyon sena a mete deyò sou jesyon fon petrocaribe yo ki mande pou lajistis mete aksyon piblik an mouvman kont divès ansyen gwo responsab leta. Men, palmantè a kwè komisyon an pat dwe pibliye rapò a nan moman pral gen eleksyon nan peyi a. Pou depite a, rapò a kapab kreye enstabilite nan peryòd elektoral la ki sansib anpil.


Platfòm Repons peyizan ak platfòm viktwa akize KEP a dèske li ta favorize rive reprezantan LAPEH a, Youri Chevry, nan tèt meri Pòtoprens fas ak ansyen kandida PHTK a, Joseph Pierre Richard Duplan. Nan yon konferans pou laprès, òganizasyon politik sa yo, ki nan sektè Tèt Kale a, kritike tou minis enteryè a, François Anick Joseph, poutèt li deklare ministè a ap gen rezilta eleksyon 9 oktòb yo menm jou a apatid yon seri GPS yo pral plase nan biwo vòt yo.


Depite Kenskòf la pale de tèt chaje li genyen konsènan rantre lekòl la ki pa parèt klè pou majorite popilasyon an. Alfredo Antoine Junior lanse yon apèl bay minis ekonomi ak finans la, Yves Bastien, pou l fè yon jan degaje mwayen pou leta ka pèmèt paran yo jwenn sibvansyon pou yo voye pitit yo lekòl.


Etidyan fakilte Etnoloji yo òganize maten vandredi a yon mouvman leve kanpe pou yo te egzije komisè gouvènman Pòtoprens la, mèt Jean Danton Léger, leve sele li mete sou lokal rektora inivèsite leta a,depi anviwon 15 jou. Selon 2 etidyan fakilte sa a, ki pale ak Radyo Tele Kiskeya, si komisè gouvènman an poze sele sou espas administratif UEH la, se fèmen li mande pou inivèsite a fèmen. Yo fè remake fòk administrasyon UEH la rete louvri pou yo kapab rive poze pwoblèm kap brase bil inivèsite a.