> Kreyòl > Aktyalite nasyonal la, madi 23 out

Ayiti/Enfòmasyon

Aktyalite nasyonal la, madi 23 out

Li tout dènye nouvèl yo

Publié le mercredi 24 août 2016

Nan yon rezolisyon tout tandans politik yo vote nan finisman apremidi madi a, Sena repiblik la mande gouvènman an tounen prese prese sou desizyon li pran pou l ogmante pri pwodui petwolye yo sou mache lokal la. 18 senatè sou 19 vote rezolisyon sa a, se sèl prezidan seyans la ki pa vote, jan regleman enteryè yo prevwa l la. Nan rezolisyon sa a, senatè yo menase pou yo entèpele gouvènman an, ki gen alatèt li Premye minis Enex Jean-Charles, si l pa fè bak sou mezi sa a tousuit paske se popilasyon an kap pote chay la. Palmantè yo presize pouvwa egzekitif la pat di okenn kote nan bidjè rektifikatif la li tap ogmante pri gaz la. Biwo sena a repiblik la anonse li pral voye tèks rezolisyon an bay pouvwa a pou l pibliye l nan jounal ofisyèl peyi a le Moniteur. Se senatè Lwès la, Jean Renel Sénatus, ki te li rezolisyon an devan asanble a.

Prezidan gwoup majoritè a, Nenel Cassy, deklare desizyon gouvènman an chaje tèt li anpil. Senatè Fanmi Lavalas la kwè pat gen nesesite pou egzekitif la te adopte mezi sa a lavèy ouvèti lekól la paske manman ak papa pitit yo ap fè fas ak yon sitiyasyon ekonomik trè difisil. Li anonse sena a ap gen pou l konvoke minis konsène yo sou kesyon sa a pou gade avèk yo pou ki rezon egzekitif la pran desizyon sa a.

Senatè Nòdès la, Jean-Baptiste Bien-Aimé, ki ap sipóte tou prezidan pwovizwa a, Jocelerme Privert, nan Gran Kò a, mande gouvénman an retounen sou desizyon l lan. Selon palmantè Lavalas Nòdès la, desizyon sa a ki rive nan okazyon óganizasyon eleksyon yo kapab kreye latwoublay ak ensekirite nan peyi a. Li mande popilasyon an rete tèt frèt paske palman an ap jwe wól li nan kesyon ogmantasyon pri gaz la.

Senatè Latibonit la, Carl Murat Cantave, ki fè pati opozisyon radikal la, denonse kòm yon krim desizyon mesye Privert ak ekip li a pran an.Palmantè KID la pale de operasyon peze souse li di prezidan pwovizwa a ap mennen nan lajan peyi a, tankou li ta óganize gwo fèt lakay li epi li fè nominasyon direktè jeneral adjwen ak sekretè deta nan enstitisyon piblik yo pou l pwoteje pouvwa l. Manm gwoup minoritè a mande popilasyon an, sendika yo ak tout lót sektè yo mobilize pou yo fóse egzekitif la retounen sou desizyon sa a.


Plizyè sendika sektè transpò a tankou APCH, FENATRAH, FENATRAPP, STTH, PFNSTH ak platfòm FIDEL deside pase yon lòt vitès nan dosye ogmantasyon pri gaz la, ki pa sispann soulve pwotestasyon nan peyi a. Yo avèti jedi yap deklannche yon grèv avètisman depi gouvènman Privert/Jean Charles la pa fè bak sou desizyon li pran an, mèkredi a midi pou pita. Nan yon konferans pou laprès, reprezantan sendika yo deklare yo pa pral chita ak otorite yo toutotan yo pa retounen sou mezi sa a ki ap agrave mizè popilasyon an. Pòtpawòl Sendika transpò terès ayisyen an (STTH), Jacques Anderson Desroches, ak responsab Platfòm nasyonal sendika transpò ayisyen an (PFNSTH), Jean Louis Fortuné, te pran lapawòl nan non kanmarad yo.


Inite Santral Ransèyman Finansye (UCREF) lonje dwèt sou kandida alaprezidans PHTK a, Jovenel Moïse, kòm yon moun ki ta nan aktivite blanchi lajan sal, sou baz analiz divès tranzaksyon labank, mouvman lajan ak acha li te fè soti 2007 pou rive 2013. Nan yon rapò UCREF voye bay otorite lajistis yo pou suit nesesè, yon dokiman Radyo Tele Kiskeya rive fouye, enstitisyon an di li konstate soti 5 me 2007 pou rive 31 me 2013, valè lajan mesye Moïse te brase yo pa koresponn ni ak sa li ta ka antre kòm salè ni ak aktivite biznis li posede yo.
Jovenel Moïse alatèt Jomar Autoparts, Agritrans S.A ak Comphener S.A.

Menm rapò a di, nan ankèt UCREF mennen sou 14 kont an bank kandida PHTK a genyen nan BPH, BNC, BUH, Scotiabank ak KOTELAM, li jwenn pa egzanp soti 16 janvye 2012 pou rive 29 avril 2013, depo ki te fèt sou kont Jovenel Moïse ak madanm li, Martine Moïse, genyen nan BNC ansanm, te monte 5 milyon 552 mil 999 dola ameriken.

Yon lòt pa, nan dat 7 mas 2013, yon dokiman OAVCT te montre 45 machin te anrejistre sou non biznismann kandida a, 31 ladan yo te tounèf.

Radyo Tele Kiskeya pat rive jwenn reyaksyon Jovenel Moïse sou gwo dosye sa a, ni presizyon bò kote pakè Pòtoprens pou konnen si l deja resevwa korespondans UCREF la e ki suit lap ba li.

Konseye estratejik PHTK a , Guichard Doré, radyo Kiskeya te kontakte, pat vle reyaji sou rapò UCREF la akòz li poko genyen’l nan men l. Sa pa anpeche li kwè se pouvwa a ki ta dèyè dosye sa a pou l sal imaj kandida alaprezidans PHTK a.


Konsèy elektoral pwovizwa a ouvè ofisyèlman jounen madi a kanpay elektoral pou eleksyon lejsilativ pasyèl yo, pou tyè sena a ak premye tou eleksyon prezidansyèl yo ki fikse pou 9 oktòb kap vini an. Jis rive 7 oktòb, kandida ki angaje nan kous la ap kapab reyalize divès aktivite pou yo mobilize elektè yo an favè kòz yo. An tou, 6 milyon 189 mil 160 elektè gen non yo sou lis elektoral kòm sitwayen ki kapab al patisipe nan eleksyon sa yo kap dewoule nan 12 mil 51 biwo vòt ki ap anndan mil 537 sant vòt, selon chif prezidan KEP a, Léopold Berlanger, prezante. Pi lwen, responsab la mande tout kandida yo respekte règ jwèt la pandan l raple yo gen sanksyon dekrè elektoral la prevwa kont kandida ki ta fè vyolans nan peryòd kanpay nan. Prezidan KEP a bay garanti enstitisyon an, vijilans sitwayen yo ap kore, ap kwape tout kalite magouy ak zak gwo ponyèt kèlkeswa kandida a ta fè pou l genyen eleksyon yo nan move kondisyon kont volonte pèp la ak prensip demokratik yo. Jiska lendi, se anviwon 82 mil mandatè pati politik ki te enskri sou entènèt. KEP a pwolonje delè pou rès mandatè yo enskri jiska 30 dawout, menm jan ak obsèvatè elektoral yo, selon Léopold Berlanger.

Prezidan KEP a, ki tap reponn kesyon jounalis, di li pa gen enfòmasyon konsènan manda arestasyon lajistis nan vil Okay ta lage dèyè kandida senatè Grandans, ansyen chèf rebèl 2004 yo, Guy Philippe. Léopold Berlanger presize, yon lòt pa, nan pwochèn eleksyon yo, se sèlman elektè ki gen non yo sou lis ki nan biwo vòt yo kap kapab jete bilten. Li anonse tou dispozisyon ki konsène polisye kap an misyon yo ak woulman mandatè yo nan biwo vòt yo. Sou bidjè eleksyon yo, direktè egzekitif KEP a, Uder Antoine, fè konnen leta ayisyen deja dekese 14.5 milyonn dola, sou yon total 25 milyon ki ap nesesè pou reyalizasyon eleksyon 9 oktòb yo.