> Kreyòl > Chanjman anbasadè ameriken ann Ayiti lavèy eleksyon

Chanjman anbasadè ameriken ann Ayiti lavèy eleksyon

James B. Foley ap sede laplas bay yon ansyen, Timothy Michael Carney

Publié le mardi 9 août 2005

Anbasadè ameriken an ann Ayiti, James B. Foley, pral kite pòs li nan jou k’ap vini yo, pou l sede laplas bay yon ansyen anbasadè Etazini nan Pòtoprens, Timothy Michael Carney. Dapre yon kominike anbasad amerikèn parèt lendi nan kapital la pou anonse nouvèl la, chanjman sa a, ki te prevwa depi lontan, pa vle di gen yon pwèlyèm ki pral soti nan politik gouvèlman ameriken an ap mennen nan peyi a.

Kominike a presize toutokontrè, Wachintonn kontinye ap apiye san gad dèyè tranzisyon demokratik la ki dwe mennen nan eleksyon dekwa pou pèp ayisyen an kapab chwazi nouvo dirijan l yo.

Dapre enfòmasyon radyo Kiskeya jwenn nan bon ti mamit, James Foley se li menm menm ki ta mande pou yo ranplase l, apre 2 lanne konsa li sot pase nan pòs la. Diplomat la ki dwe al fè kou nan yon inivèsite Nouyòk, kapab kite peyi a samdi pwochen konsa.

Desizyon gouvèlman Bush la ki tonbe nan yon sitiyasyon espesyal, kèk mwa anvan eleksyon dewoule nan peyi a, ap pèmèt Thimothy Michael Carney vin reskonsab anbasad amerikèn la ann Ayiti, annatandan yon nouvo anbasadè rive nan pòs la. Anbasadè Carney ki se yon repibliken, te deja alatèt misyon diplomatik amerikèn nan peyi a. Malgre li se yon diplomat de karyè, li te renmèt demisyon l an 1999. Alepòk près lavalas la te fè konnen se yon gwo mezantant ant anbasadè a ak politik kò likid Prezidan demokrat la Bill Clinton, ki te fè anbasadè a te rale kò l.

Timothy Michael Carney fè pati tou yon òganizasyon yo rele "Haïti Democracy Project". Se yon gwoup presyon ki rasanble, nan Wachintonn, ayisyen ak ameriken k’ap batay pou demokrasi ann Ayiti ak pou gen yon sosyete sivil djanm.

Liliane Pierre-Paul éléments Aller à la galerie de Liliane Pierre-Paul