> Kreyòl > Eleksyon : chèf MINISTA a bat bravo pou enskripsyon divès pati politik (...)

Eleksyon : chèf MINISTA a bat bravo pou enskripsyon divès pati politik yo

Juan Gabriel Valdés swete tou liberasyon Yvon Neptune

Publié le mardi 9 août 2005

Chèf sivil misyon Nasyonzini pou stabilize Ayiti a epi reprezantan espesyal Sekretè jeneral òganizasyon an, Juan Gabriel Valdés, bat bravo pou jan dosye eleksyon yo ap vanse a, sitou pou faz enskripsyon pati politik yo ki fini. Mesye Valdés ki t ap pale madi nan yon konferans pou laprès nan Pòtoprens, di li sezi wè valè pati politik ki enskri. Li kwè kounyeya pèsonn pa kapab di ankò y ap mete yon sektè deyò nan jwèt politik la, paske tout kalite pati ap prezan nan eleksyon yo.

Diplomat chilyen an pwofite presize kominote entènasyonal la dispoze bay tout asistans ki nesesè pou dewoulman eleksyon yo ki, menm si dat yo chanje, dwe pèmèt wè pa wè, yon nouvo pouvwa enstale 7 fevriye 2006. Nan sans sa a, Juan Gabriel Valdés voye yon pinga bay tout sektè ki ta gen entansyon fè menas oswa vyolans sou lidè politik yo pandan kanpay elektoral la, pou yo teke fren yo. An menm tan tou, li mande pati politik yo pou yo respekte angajman yo te pran nan kòd konduit elektoral la, pou yo mennen kanpay san bri san kont.

Yon lòt pa, Chèf MINISTA a fè bandi yo konnen misyon an pare pou l frape yo di, depi y ap pèsiste nan derefize depoze lèzam. Li montre li satisfè anpil de amelyorasyon sitiyasyon sekirite a nan peyi a, pandan l ankouraje komèsan yo reprann aktivite yo anba lavil Pòtoprens ; yon zòn bandi ame patizan Aristide yo te fè tounen yon lanfè pandan dènye mwa sa yo.

Nan domèn dwa moun, Valdés deklare kare bare li pa posib pou yo mete nan depo Yvon Neptune, ki se yon ansyen Premye minis. Li pratikman mande liberasyon ansyen chèf gouvèlman lavalas la. Reprezantan espesyal Koffi Annan nan ann Ayiti ale pi lwen toujou, lè l fè konnen li prezante gouvèlman pwovizwa a yon lis prizonye li kwè ka yo merite pran an konsiderasyon. Diplomat chilyen an ki pa bay tèt li ankenn limit, menm bliye prensip endepandans lajistis ki egziste nan tout demokrasi. spp/Radio Kiskeya

Liliane Pierre-Paul éléments Aller à la galerie de Liliane Pierre-Paul