> Kreyòl > Kidnaping sou ansyen depite Kelly Bastien

Kidnaping sou ansyen depite Kelly Bastien

Publié le mercredi 10 août 2005

Ansyen prezidan chanm depite 46e lejislati a ki se tou medsen, Kelly Bastien, tonbe anba men espesyalis kidnaping yo madi nan Pòtoprens, pandan l t’ap pase yon kote sou volan machin li. Selon enfòmasyon fanmi viktim nan mete deyò mèkredi, se plizyè bandi ame ki te friz Doktè Bastien ak zam yo nan men yo, anvan yo te pati avè l.

Eskanmòtè yo mande yon mago 200 mil dola youwès, pou yo kapab aksepte bay misye libète.
Aktivite kidnaping yo ki te fè yon bon bese, pandan dènye senmenn sa yo, gras ak aksyon Polis Nasyonal epi MINISTAH, sanble anvi reprann vitès yo.

Bastien ki te fè yon fèmen pratikman sou aktivite politik, t ap travay depi kèk tan nan yon òganizasyon entènasyonal, nan depatman Nòdwès, ki ap fonksyone nan domèn lasante. Men, sou papye, Doktè a toujou rete yonn nan dirijan pati politik ESKANP ki te fòme nan epòk gwo deba pasyon ki te konn genyen nan Palman an, ant blòk antineyoliberal la ak blòk OPL la, soti 1996 pou rive 1999.

Kelly Bastien, menm jan ak lòt palmantè epòk la, pat fini manda l, paske Prezidan René Préval ki te sou pouvwa a te kraze Palman an, nan mwad janvye 99, pou l te kapab louvri wout pou frè marasa l la, Jean-Bertrand Aristide, te retounen sou pouvwa a. spp/RK

Liliane Pierre-Paul éléments Aller à la galerie de Liliane Pierre-Paul