> Kreyòl > Chavannes Jean-Baptiste : René Préval, maryonèt Aristide, pa yon chwa pou (...)

Chavannes Jean-Baptiste : René Préval, maryonèt Aristide, pa yon chwa pou Ayiti

Publié le jeudi 11 août 2005

Lidè Mouvman Peyizan Papay la (MPP), Chavannes Jean-Baptiste, deklare nan Plato Santral, ansyen Prezidan René Préval pa kapab yon chwa pou pèp ayisyen an nan pwochèn eleksyon yo, paske li se maryonèt Jean-Bertrand Aristide e pi gwo reskonsab katastwòf peyi a ap viv jodi a. Bri ki ap kouri deyò a ki vle fè kwè Préval kapab kandi KONBA pou chèz boure a pa kanpe sou anyen, selon Chavannes Jean-Baptiste ki se yonn nan dirijan pati politik tounèf sa a. Li sèmante 77 fwa 7 fwa, se nan rèv sèlman yon moun ta kapab wè yon bagay konsa.

Lidè MPP a ki te pase yon tan ap kolabore ak Préval, nan kabinè li nan Palè Nasyonal, anvan l te divòse avè l, fè konnen se gagòt ansyen chèf leta a te fè nan eleksyon 21 me ak 26 novanm 2.000 yo, pou l te fè Aristide plezi, ki lakòz jodi a Ayiti anba okipasyon fòs militè etranje.

Yon lòt pa, Chavannes Jean-Baptiste kwè gen yon dil politik ki fèt ant Fanmi Lavalas (pati Aristide la) ak kominote entènasyonal la sou kesyon eleksyon yo. Selon lidè peyizan an, yon bò nan Lavalas aksepte pou ale nan eleksyon pandan nan menm moman an, chèf sivil misyon Nasyonzini an, Juan Gabriel Valdés, dekrete fòk yo lage ansyen Premye minis Aristide la, Yvon Neptune ki nan prizon pou akizasyon ki tonbe sou do l nan masak Lasiri a.

Pou fini, Chavannes Jean-Baptiste bat bravo pou desizyon Konsèy Elektoral Pwovizwa a pran pou l pwolonje enskripsyon sitwayen yo jis rive 15 sektanm. Li swete tou ap gen plis sant enskripsyon pou tout moun ka fè kat elektoral yo. Reskonsab MPP a presize se paske manke sant enskripsyon ki fè, pou tabli solidarite ak peyizan yo, li pokò al fè kat pa li. spp/RK

Liliane Pierre-Paul éléments Aller à la galerie de Liliane Pierre-Paul