> Kreyòl > Eleksyon : sekretè jeneral OEA a, José Miguel Insulza, satisfè pou enskripsyon (...)

Eleksyon : sekretè jeneral OEA a, José Miguel Insulza, satisfè pou enskripsyon yo

Publié le vendredi 12 août 2005

Sekretè jeneral òganizasyon Eta ameriken yo, José Miguel Insulza, bat bravo vandredi nan Wachintonn pou jan operasyon enskripsyon elektè yo ap dewoule ann Ayiti, nan okzayon eleksyon ki fikse pou finisman lanne a. Insulza ki te vizite peyia sa gen kèk senmenn, deklare ak 427 sant enskripsyon ki ouvè e ki ap fonksyone, OEA santi li ankouraje e li gen konfyans nan lavni lè l wè anpil sitwayen grandèt majè, fanm kou gason, pa sispann enskri pou y al vote. Lè òganizasyon an konte byen, li wè gen yon milyon 300 mil moun konsa ki fè kat elektoral yo deja.

Diplomat chilyen an pwofite fè lwanj pou OEA, li di ki founi KEP a, espesyalis ki nan pwogram asistans teknik elektoral la, ki pèmèt enskripsyon yo ap vanse. José Miguel Insulza presize tou, jounen elektoral nasyonal la, se yo menm nan OEA ki te òganize li 24 jiyè ki sot pase a, selon yon plann batay byen defini, ki fè yon vitès siperyè antre nan operasyon enskripsyon yo. Alòske tout moun te konprann se te sou reskonsablite Konsèy Elektoral Pwovizwa a jounen sa a te ye.

Alatèt OEA a ki pwofite aplodi desizyon otorite yo pran pou yo pwolonje enskripsyon yo, jis rive 15 sektanm, mande ayisyen yo pou yo pa fè vyolans nan okazyon eleksyon yo. "OEA ap kontinye kwè popilasyon an ap voye vyolans jete, yon fason pou tout moun kapab vote ak vire paj tranzisyon demokratik la" pawòl ki soti nan bouch mesye Insulza ki te pale mèkredi nan Santo Domingo, de posiblite pou Nasyonzini mete Ayiti sou kontwòl nèt, tankou yon peyi restavèk.

Dekrè elektoral la ki toujou kenbe prevwa pou eleksyon lokal yo dewoule 9 oktòb ; alòske eleksyon pou Palman an ak Prezidan an dwe fèt 13 novanm ak 18 desanm. spp/RK

Liliane Pierre-Paul éléments Aller à la galerie de Liliane Pierre-Paul