> Kreyòl > Yon lòt kandida Prezidan : ansyen Senatè Paul Denis

Yon lòt kandida Prezidan : ansyen Senatè Paul Denis

Publié le mardi 16 août 2005

Ansyen Senatè Paul Denis se kandida òganizasyon pèp k ap lite (OPL) chwazi ofisyèlman pou reprezante l nan eleksyon prezidansyèl ki dwe fèt nan peyi a, nan dat 13 novanm ak 18 desanm. Kòdonatè jeneral pati a, ansyen Senatè Edgard Leblanc Fils ki anonse nouvèl la madi, deklare se pi bon kandida OPL te kapab chwazi.

Reskonsab pati defen pwofesè Gérard Piere-Charles t ap dirije a, fè konnen Paul Denis gen konpetans, kalite lidè ak popilarite pou l vin chèf Leta. Edgard Leblanc kwè "ansyen palmantè a popilè nan mas pèp la, nan klas mwayèn nan ak nan mitan boujwa pwogresis liberal yo".

Paul Denis ki se ansyen Senatè Sid soti 1996 pou rive 1999, nan 46e lejislati a, te pran pozisyon ak kouray sou yon seri dosye li te mennen ankèt sou yo, nan komisyon ankèt chanm nan, tankou sou dosye TEVASA a, yon waf prive ki t ap mete kòb nan pòch gwo biznismann sou do leta ayisyen, pandan peryòd koudeta 91 la. Denis ki te patnè politik Jean-Bertrand Aristide an 1990, te kanpe anfas li nèt apatid eleksyon 2.000 yo ki te pèmèt Aristide reprann pouvwa a nan gwo magouy. Kandida a fèk sot renmèt otorite yo rapò komisyon ankèt yo te ba l dirije a, pou te fè limyè sou lajan peyi a ki te fè fon nan move kondisyon, pandan 3 dènye lanne Aristide yo, soti fevriye 2001 pou rive fevriye 2004.

Nan 24 èdtan, sa fè 2 kandida anplis pou chèz boure a yo prezante. Anvan Paul Denis, lendi, yon kowalisyon tounèf MUP te anonse li chwazi Gérard Gourgue kòm kandida li. spp/RK

Liliane Pierre-Paul éléments Aller à la galerie de Liliane Pierre-Paul