> Kreyòl > Defile kandida pou Prezidan : biznismann Dumarsais Siméus rive

Defile kandida pou Prezidan : biznismann Dumarsais Siméus rive

Publié le mercredi 17 août 2005

Dumarsais Mécène Siméus, yon gwo biznismann ayisyen ki tabli depi digdantan Ozetazini, antre nan batay la mèkredi kòm yon kandida andiplis nan batay pou chèz boure Palè Nasyonal la. Mesye Siméus ki gen ti jwèt non Dumas, anonse li kandida endepandan pou l vin Prezidan Dayiti, nan okazyon yon rasanbleman devan plizyè santèn moun, nan lokalite kote l te fèt la Desoulye, nan Pon Sonde toupre vil Senmak, nan Latibonit.

Mesye Siméus ki prezante tèt li kòm yon gwo lidè, menm jan ak ansyen Prezidan Dumarsais Estimé, pwomèt pou si li pran pouvwa a li rezoud pwoblèm tankou pwoblèm sante, edikasyon, elektrisite nan peyi a ak kreye anpil djòb toupatou. Kandida a fè konnen avèk li kòm Prezidan, tout ayisyen ap fyè de Ayiti. Li ajoute li posede mwayen ki pa rete ak mwayen, pou l kapab ranpòte laviktwa nan eleksyon yo ki fikse pou dat 13 novanm ak 18 desanm.

Dumarsais Mécène Siméus prezante kandidati l an prezans anpil medya ayisyen ak etranje, ladan yo chèn televizyon amerikèn CNN ak TV5, televizyon entènasyoanl lang franse a.

Dapre jounal Miami Herald ki parèt yon atik sou kandida a menm jounen mèkredi a, Dumarsais Siméus ki bezwen vin pwochen lidè peyi a, posede yon fòtin ki egal 100 milyonn dola youwès. Nan gwo konpayi ki fè manje, li ap dirije Otegzas, li gen plizyè santèn moun kòm anplwaye.

Siméus ki gen plis pase 40 lanne depi li ap viv Ozetazini, fè lis kandida alaprezidans yo rive 15 pou pipiti, pou kounyeya. spp/RK

Liliane Pierre-Paul éléments Aller à la galerie de Liliane Pierre-Paul