> Kreyòl > MINISTA : tout wout bon pou bouske lapè

MINISTA : tout wout bon pou bouske lapè

Publié le jeudi 18 août 2005

Pòtpawòl misyon Nasyonzini an ann Ayiti, Damian-Onces Cardona, deklare jedi nan Pòtoprens, yo oblije anvizaje tout kalite posiblite nan aksyon y ap mennen sou teren an, depi se pou mete lapè nan peyi a. Pòtpawòl la ki t ap reponn kesyon Radyo Kiskeya sou enfòmasyon Associated Press te bay konsènan posiblite pou ta gen negosyasyon ak "Jeneral Toutou", chèf "Lame Rat" katye Bèlè a, pou l depoze lèzam san anyen pa fè li, montre MINISTA pa kanpe sou menm pozisyon ak Polis Nasyonal la ki limenm di klè "Jeneral Toutou" ap jwenn sekirite pou li ale nan prizon, men li pa kapab benefisye senkòb libète pou l paweze.

"Jeneral Toutou" ki gen sou do l divès akizasyon krim, ladan yo kò anasinay sou jounalis/powèt Jacques Roche, 14 jiyè, te pwopoze nan finisman senmenn pase a pou otorite yo ta ba l garanti l ap benefisye padon total kapital, depi l kanpe sou aktivite bandi l yo, nan platon Bèlè.

Cardona kouri ajoute, deklarasyon l lan pa vle di pou sa, MINISTA louvri yon karako sitirans pou tout kriminèl ki fin fè move zak, kouri al kache anba li, lè yo fin aksepte depoze lèzam.

Yon lòt pa, pòtpawòl MINISTA a kondane operasyon filange, sasinen moun li idantifye kòm bandi, popilasyon an deklannche depi 2 senmenn, nan divès katye danje nan kapital la kote pandan mwa ki sot pase yo, menm mouch pat kapab vole tèlman vyolans te gen lavwa ochapit. Damian-Onces Cardona ki raple sitwayen yo, yo pa tribinal ki plase pou bay santans kondanasyon, mande tout moun nan popilasyon an pou yo kolabore ak fòs sekirite yo, pou yo ka konbat bandi yo pi ben. spp/RK

Liliane Pierre-Paul éléments Aller à la galerie de Liliane Pierre-Paul