> Kreyòl > Gouvèlman an ak MINISTA montre imaj antant apre gwo chire pit

Gouvèlman an ak MINISTA montre imaj antant apre gwo chire pit

Publié le mercredi 9 mars 2005

Chèf MINISTA a Juan Gabriel Valdes deklare madi swa nan katye jeneral gouvèlman an (Vila Dakèy) pa gen ankenn gwo pwoblèm ant misyon Nasyonzini an ak Polis Nasyonal la, li kwè ki oblije kontinye kolabore yonn ak lòt. Reprezantan pèsonèl sekretè jeneral Nasyonzini an ann Ayiti, ki t’ap pale anvan rankont ki fèt chak madi ant Konsèy Siperyè Polis Nasyonal la ak MINISTA, deklare yo te mal konprann pawòl li yo, nan entèvyou li te bay jounal "Miyami Eral" senmenn pase a.

Selon jounal ameriken an, Valdes te avèti PNH "l’ap jwenn ak pa l’ depi l’ konprann l’ap mache kraze manifestasyon pasifik, pou l’ enpoze pèp la di sa l’ panse". Kòmandan MINISTA a li menm jeneral brezilyen Augusto Heleno te lonje dwèt sou PNH kòm reskonsab 3 lanmò, nan tire sou patizan Aristide yo ki t’ap manifeste san bri san kont sou Bèlè 28 fevriye. Lapolis ak tout minis jistis la Bernard Gousse te demanti tout akizasyon sa yo.

Nan menm konferans pou laprès madi swa a, Premye minis Gérard Latortue montre li pa bay enfòmasyon ki ap sikile sou fas pou fas ant otorite peyi a ak MINISTA pyès enpòtans. Men, chèf gouvèlman an presize kanmèm li pa nòmal, pou se misyon Nasyonzini an moun ap ekri pou anonse manifestasyon ; li raple selon konstitisyon an se PNH pou tout gwoup ki deside òganize manifestasyon nan peyi a ekri 48 èdtan davans.

Tout manm Konsèy Siperyè Polis la te prezan nan moman deklarasyon sa yo t’ap fèt.