> Kreyòl > Konsèy sekirite Nasyonzini an pran pozisyon anfavè yvon Neptune ak (...)

Konsèy sekirite Nasyonzini an pran pozisyon anfavè yvon Neptune ak lavalas

Publié le jeudi 10 mars 2005

Nan yon deklarasyon 15 manm Konsèy sekirite a adopte mèkredi nan Nouyòk, apre prezantasyon dènye rapò sou sitiyasyon an ann Ayiti, yo kritike kare bare desizyon yo di otorite yo pran, pou kenbe ansyen Premye minis lavalas la Yvon Neptune nan prizon, malgre pa gen ankenn akizasyon ki pote kont li. Konsèy sekirite a ki pwofite bat bravo pou lajistis ki libere dènyèman plizyè patizan Jean-Bertrand Aristide, mande otorite yo pou yo respekte dwa moun epi li denonse yon seri move zak manm Polis Nasyonal la fè, san pa gen ankenn ankèt ki mennen sou yo.

Konsèy sekirite a ki swete pi lwen pou yo dezame gwoup ilegal yo, espesyalman militè demobilize yo, fè konnen pil vyolasyon dwa moun k’ap plede fèt ann Ayiti yo, chaje tèt li anpil.
Nan menm deklarasyon an, 15 manm Konsèy la mande tout sektè nan peyi a mobilize, pou ale nan eleksyon.

N’ap raple, Konsèy sekirite a ki se pi gwo enstans nan òganizasyon Nasyonzini, rasanble peyi tankou Etazini, Lafrans ak Brezil ki toujou prezante tèt yo kòm gwo zanmi Ayiti.