> Kreyòl > Pwotestasyon adwat agoch kont desizyon pou etène Neptune nan lopital (...)

Pwotestasyon adwat agoch kont desizyon pou etène Neptune nan lopital MINISTA

Publié le samedi 12 mars 2005

Moun nan vil Senmak deklannche manifestasyon jounen vandredi a, pou pwoteste kont transfè ansyen Premye minis la nan lopital militè Nasyonzini an. Manifestan yo ki te an kòlè anpil, mache fèmen pòt tout biwo leta yo, kraze vit divès machin epi mete barikad flanm dife ki te bloke sikilasyon an nèt nan vil Senmak.
Charliénor Thompson yonn nan dirijan rasanbleman militan konsekan Senmak (RAMIKòSM) ak avoka viktim masak Lasiri yo mèt Samuel Madistin, leve kanpe kont mezi Nasyonzini an, yo kwè ki se yon kokenn souflèt pou enstitisyon nan peyi a, espesyalman lajistis. Mèt Madistin ki egzije pou y’al swaye Neptune nan yon lopital sivil ayisyen, panse sa k’ rive a se rezilta travay yon seri anbasad nan peyi a ap fè.

Pati politik tankou KONAKòM (Victor Benoît), KID (Evans Paul) OPL (Paul DENIS) ak MDN (Hubert Deronceray) kwè sitiyasyon sa a vyole prensip respè otorite lajistis epi egzije pou otorite yo pote koreksyon rapid rapid.

Bòte pa yo òganizasyon dwa moun yo denonse sa yo rele yon operasyon sove, kominote entènasyonal la ak otorite ayisyen yo mete ansanm pou òganize.
Reprezantan platfòm òganizasyon dwa moun yo, kowalisyon nasyonal pou dwa ayisyen(NCHR), ak enstiti mobil edikasyon demokratik (IMED) pat jwenn lese pase nan men MINISTA pou yo te al rann Yvon Neptune vizit nan lopital militè kote l’ kouche a.

Ansyen Premye minis lavalas la ak tout ansyen minis enteryè li a Jocelerme Privert te deklannche yon grèv grangou, senmenn pase a, pou yo pat al jije senmak kote lajistis dwe poze yo kesyon sou patisipasyon yo nan masak Lasiri a ki te lakòz yon senkantèn moun te pèdi lavi yo, nan dat 11 fevriye 2004.