> Kreyòl > Yvon Neptune kouche nan lopital Nasyonzini, sou kontwòl lajistis ayisyèn (...)

Yvon Neptune kouche nan lopital Nasyonzini, sou kontwòl lajistis ayisyèn selon MINISTA ak gouvèlman an

Publié le samedi 12 mars 2005

Nan yon kominike li parèt vandredi nan Pòtoprens, misyon Nasyonzini an ann Ayiti fè konnen, menm si se nan lopital militè ajanten yo li kouche, ansyen Premye minis lavalas la Yvon Neptune toujou sou kont lajistis ayisyèn. Minista presize se nan tèt ansanm ak gouvèlman an, desizyon te pran pou transpòte Neptune jedi swa byen ta, soti nan Penitansye Nasyonal, pou ale nan baz militè Nasyonzini an, nan zòn ayopò entènasyonal mayi gate.
Nan yon konferans pou laprès, doktè an chèf lopital militè a Carlos Bedjan anonse ansyen chèf gouvèlman lavalas la mete yon pwen final nan grèv grangou li t’ap fè a ; e eta sante l’ parèt stab paske l’ kòmanse manje fwi ak fwomaj.

Sou bò pa l’, minis jistis la mèt Bernard Gousse bay garanti mesye Neptune p’ap sove, jan bri a ap kouri deyò a ; li dwe al jije Senmak pou masak Lasiri a, kou sante l’ pèmèt li. Minis la ki presize gen moun ki ta swete etenn souf Yvon Neptune, pou anpeche l’ pale nan yon pwosè nòmal, ajoute kote prizonye ye a li plis an sekirite. Minis la mande popilasyon Senmak la pou l’ rete kalm, dekwa pou lajistis ka fè travay li, paske Neptune sou kontwòl 2 ajan APENA k’ ap veye l’ lannwit kou lajounen.