> Kreyòl > Etazini kontinye ap bay pinga pou meriken pa vini ann Ayiti

Etazini kontinye ap bay pinga pou meriken pa vini ann Ayiti

Publié le samedi 12 mars 2005

Depatman deta pase sitwayen ameriken yo yon lòt modòd, pou yo pa pran chans vwayaje ann Ayiti, akòz gwo danje vyolans, pwoblèm sekirite yo kapab rankontre. Nan kominike li parèt la vandredi, ministè afè etranjè Etazini an fè tout ameriken ki vle fè yon pase pa bò isit sonje, ann Ayiti manifestasyon kapab pran lari bridsoukou e dezagreman kapab pete, gwo twoke kòn kapab fèt ant gwoup ame yo.

Menm kominike a deklare ameriken ki vin rann vizit ann Ayiti oswa ki rete nan peyi a dwe toujou rete veyatif, piske lapolis chaje ak tou vid nan diferan rejyon, gen danje pou zak piyay fèt , pou y’al banke sanzatann ak barikad gang oubyen lapolis kapab mete.

Depatman deta avèti sitwayen yo tou kapab gen gwo zak vyolans, krim, kidnapping operasyon detounen machin sou wout ak lòt kalite atak.

Menm manm misyon diplomatik li a nan Pòtoprens, gouvèlman ameriken an mande yo pou yo pran prekosyon yo ; pa pran chans soti leswa.

Gouvèlman ameriken an ki soti nòt sa a, toujou prezante tèt li kòm alatèt yonn nan peyi ki plis zanmi Ayiti.