> Kreyòl > Eskandal koripsyon sou lavalas : Palè Nasyonal, Primati a ak divès reskonsab (...)

Eskandal koripsyon sou lavalas : Palè Nasyonal, Primati a ak divès reskonsab angaje jiskokou

Publié le mercredi 16 mars 2005

Nan dosye li mete deyò depi senmenn pase a, radyo KISKEYA parèt mèkredi ak plis presizyon sou 9milya 982 milyonn goud ak plis pase 113 milyonn dola youwès ki fè fon sou rejim Aristide la, soti fevriye 2001 pou rive fevriye 2004.
Annatandan lajistis fè travay li, radyo KISKEYA kapab di, gen dokiman klè ak tout nimewo chèk yo, ki montre san di pètèt, nan sekretarya prive Aristide sèlman, pandan dezyèm manda l la, plis pase 27 milyonn dola te disparèt san pyès esplikasyon.

Pami 28 moun ki dwe gen manda lage dèyè yo viteprese, ou jwenn nan kategori konplis yo, Oriel Jean ansyen chèf sèvis sekirite Jean-Bertrand Aristide. Mesye Jean ki fèmen nan prizon pou dwòg Ozetazini, te resevwa yon chèk 1milyon 18 mil 840 dola vèt nan men sekretarya prive Prezidan epòk la ; yon lòt chèk 123 milyon 289 mil 931 goud edmi te soti nan menm administrasyon an, sou non Oriel Jean. 2 operasyon louch sa yo te fèt ant 24 janvye 2001 ak 21 fevriye 2003.
Ansyen direktè jeneral Polis Nasyonal la Jean Nesly Lucien gen non l sou lis konplis yo tou. Mesye Lucien ki fèmen nan kat miray tou Ozetazini pou biznis poud, te resevwa chèk pou yon valè 11 milyon 842 mil goud ant 23 fevriye ak 23 mas 2001.

Dokiman radyo KISKEYA jwenn yo, montre tou Palè Nasyonal te antre nan politik grese pat anpil lòt moun. Konsa, yon konplis te resevwa yon chèk 281 mil dola youwès ak yon lòt 104 milyon 146 mil goud soti 2001 pou rive 2003 ; yon lòt te benefisye yon chèk 145 mil dola 189 dola 56 ak yon lo chèk 34 milyon 357 mil goud ant 24 janvye 2001 ak mwad fevriye 2004, lè rejim Aristide la te kase kòd.

Nan biwo Premye minis la te gen anpil aktivite distribisyon chèk tribò babò. Nan kondisyon sa a, soti 31 oktòb 2003 pou rive 24 janvye 2004, yon gwo konplis te mare 13 milyon 691 mil goud nan biwo dènye chèf gouvèlman lavalas la. Yon lòt moun nan menm kategori a, te resevwa plizyè chèk ki te bay kòm total 6 milyonn goud ant 21 ak 28 desanm 2001, sou anvan dènye Premye minis la. Chapit sa a te rele « depans chèf ki pa gen kont pou rann ».

Sèvis otonòm yo t’ap boule gra tou. Nan yon sèl nan sèvis sa yo, ki toujou gen gwo kès foure men pran ki disponib, 2 milya goud te soti san ankenn esplikasyon.

Gen medya tou ki te benyen nan sòs koripsyon pouvwa lavalas la selon dokiman yo. Yon radyo te resevwa yon chèk 100 mil dola youwès ak yon lòt 1 milyon 600 mil goud ant 16 oktòb 2003 ak 2 fevriye 2004. Se yon sèvis otonòm ki te bay estasyon sa a toulède chèk yo.