> Kreyòl > Lakou Kasasyon voye jete demand Jocelerme Privert pou l jije (...)

Lakou Kasasyon voye jete demand Jocelerme Privert pou l jije Pòtoprens

Publié le vendredi 18 mars 2005

Jij Lakou Kasasyon yo voye jete vandredi nan Pòtoprens, demand ansyen minis enteryè lavalas la Jocelerme Privert te prezante l, pou l te jije nan kapital la olye nan vil Senmak. Sou baz desizyon sa a se nan Senmak, kote masak Lasiri a te fèt la, pwosè Privert ak tout ansyen Premye minis lavalas la Yvon Neptune dwe dewoule, devan jij enstriksyon ki reskonsab dosye a Clunie Pierre jules.

Jocelerme Privert kouche depi mèkredi swa nan lopital Kanape Vè, kote jij la voye l al resevwa laswenyay, poutèt li te vin febli akòz yon grèv grangou li t’ap fè depi plizyè senmenn, nan Penitansye Nasyonal.

Kanta pou ansyen Premye minis Aristide la, li twouve l de pi 8 jou nan yon lopital militè Nasyonzini, toupre ayopò entènasyonal Pòtoprens la, san jij Clunie Pierre Jules pat bay otorizasyon pou sa.

2 ansyen dirijan lavalas yo dwe jije pou akizasyon ki tonbe sou do yo, pou gwo reskonsablite yo ta genyen nan masak Lasiri a, ki te lakòz plizyè dizèn moun te mouri oubyen disparèt nan dat 11 fevriye 2004, nan moman patizan rejim Aristide la t’ap kraze brize nan Senmak, pou defann pouvwa a.