" /> "/>

> Kreyòl > "Foto ane a" pou UNICEF se yon imaj lawont ann Ayiti

Ayiti-UNICEF-Foto

"Foto ane a" pou UNICEF se yon imaj lawont ann Ayiti

Yon tifi lage pou kont li nan yon bidonvil seke ak ma dlo sal, fatra epi koure kochon

Publié le samedi 27 décembre 2008

Fon Nasyonzini pou timoun (UNICEF) chwazi yon foto ki avili Ayiti, ak imaj yon timoun nan yon bidonvil kote kochon ap manje fatra, kòm "pi bon foto nan lemond pou ane 2008 la".

Sou 1.450 foto, se sa a ki pran premye pri nan yon konkou entènasyonal ki dewoule senmenn sa a nan vil Berlin ann Almay.

Foto a montre yon tifi abiye tou de blan k ap mache nan yon ma dlo labou toupre 2 koure kochon ki ap raboure fatra ak kè kontan. Pa dèyè, ou wè nan yon bidonvil plen dezolasyon yon bann ti kay lèd kole ak krache

Selon Eva Luise Kholer, marenn UNICEF ann Almay, gen yon rezon espesyal ki fè yo chwazi foto a ki se reyalizasyon yon jèn bèlj 21 lanne, Alice Smeets. Manm jiri a nan Berlin ba li rekonpans la poutèt fotograf la "rive fè soti kouray ak enèji ki nan je ti pitit la malgre li ap jwe marèl pou l kapab jwenn kote pou l pase nan mizè nwè kote l antere a".

Foto sa a, ki fè Ayiti pase pou yon depotwa e ayisyen yo pou zannimo 2 pye, montre jan etranje toujou ap gade peyi a ak anpil prejije. Sa pi grav ankò, lè se UNICEF, yon ajans Nasyonzini k ap fè travay sa a, gaye yon foto lawont sou Ayiti nan lemonn antye. Nan moman yon misyon Nasyonzini tabli nan peyi a swa dizan pou remete l sou ray. spp/Radyo Kiskeya