> Kreyòl > Yon delegasyon 5 Depite al vizite ouvriye ak etidyan ki nan (...)

Ayiti-Sosyal

Yon delegasyon 5 Depite al vizite ouvriye ak etidyan ki nan prizon

Tèt palmantè yo chaje fas ak desizyon ki pran pou transfere dosye prizonye yo nan kabinè enstriksyon

Publié le vendredi 14 août 2009

Yon delegasyon 5 nan Depite ki kore lwa sou salè minimòm nan te al vizite vandredi ouvriye ak etidyan ki fèmen nan prizon pou manifestasyon yo t ap fè an favè 200 goud la.

Hugues Célestin, reprezantan Lespwa nan sikonskripsyon Katye Moren/Limonad la (nò), deklare nan moman li t ap kite Penitansye Nasyonal temwayaj yo ranmase sou detèminasyon san parèy prizonye yo rann li tris. 2 etidyan ki fèmen nan 4 miray fè palmantè yo konnen yo pare pou yo mouri si sa nesesè pou ouvriye faktori yo touche 200 goud pa jou.

Yon pozisyon Depite a di li konprann pandan li mande kòlèg li yo, yon lòt fwa ankò, pou yo vote salè minimòm tounèf la ki se, selon li menm, baz kòmansman jistis sosyal pou moun ki pi pòv yo.

Depite Célestin, ki pwofite denonse jan lapolis matirize manifestan yo san rezon, mande ajan PNH yo teke fren yo pou yo pa reskonsab vyolasyon dwa moun gravman grav.

Apre vizit Penitansye Nasyonal la, delegasyon palmantè a te ale nan Palèd jistis pou al enfòme bò kote dwayen tribinal sivil la, mèt Roc Cadet, sou sitiyasyon prizonye yo arete nan seri manifestasyon yo. Depite OPL la Arcluche Louis-Jeune denonse kòm yon mannèv politik desizyon otorite yo pran pou yo transfere dosye ouvriye ak etidyan yo nan kabinè enstriksyon.

Palmantè Dam Mari a (Grandans, sidwès) montre tèt li chaje devan posiblite pou yo fè anpil tan fèmen nan prizon akòz dezòmè yo sou kont kabinè enstriksyon.

Plizyè lòt etidyan ki te konparèt vandredi apremidi nan pakè transfere soti nan komisarya Pòtoprens pou ale nan Penitansye Nasyonal, Gran Prizon, san otorite lajistis yo pa bay pyès esplikasyon.

Plizyè òganizasyon dwa moun, sendika ak òganizasyon sosyal ki ap defann kòz ouvriye yo reklame tou liberasyon tout prizonye yo epi pwoteste kont represyon lapolis fè pandan manifestasyon yo ki te bloke pak endistriyèl pandan plizyè jou. spp/Radyo Kiskeya