> Kreyòl > Yon sòlda MINISTA tonbe anba bal nan Site Solèy

Yon sòlda MINISTA tonbe anba bal nan Site Solèy

Publié le jeudi 14 avril 2005

Yon sòlda natif natal Filipin, ki nan misyon Nasyonzini an mouri jedi apremidi anba bal ansasen, nan Site Solèy dapre deklarasyon chèf delegasyon Konsèy Sekirite Nasyonzini an, anbasadè Ronaldo Mota Sardenberg, reprezantan pèmanan Brezil nan òganizasyon an.

Selon premye enfòmasyon yo, sòlda a tonbe anba yon katouch li resevwa nan tèt, pandan l t’ap fè patwouy nan pi gwo bidonvil kapital la. Bal pèse kas manm MINISTA a, pandan l t’ap pase sou yon machin misyon an.

Anbasadè Sardenberg ki li jedi swa nan Pòtoprens, yon kominike Konsèy Sekirite a, deklare "Konsèy la aprann nouvèl la ak anpil emosyon epi endiyasyon, li voye kondoleyans li bay sòlda filipen yo ak fanmi viktim nan. Konsèy Sekirite a kondane tou ak tout fòs li vyolans ki kontinye ap fèt sou MINISTA, sou kominote entènasyonal la ak sou popilasyon ayisyèn nan".

Sa fè twazyèm sòlda MINISTA ki mouri anba bal. Nan finisman mwad mas la, yon srilankè ak yon nepalè te tonbe anba katouch militè demobilize yo, nan Tè Wouj anba Plato Santral kote yo te al reprann kontwòl yon komisarya.