> Kreyòl > Mouvman nil pou Yvon Neptune nan Senmak

Mouvman nil pou Yvon Neptune nan Senmak

Publié le vendredi 22 avril 2005

Ansyen Premye minis lavalas la Yvon Neptune pase yon demi jounen vandredi nan Senmak, san l pa rive pase devan jij enstriksyon Clunie Pierre-Jules ki te dwe poze l kesyon, sou dosye masak Lasiri a ki te lakòz yon swasantèn moun mouri oubyen disparèt, nan dat 11 fevriye 2004.

Neptune ki te debake ak bout kanson, mayo manch raz epi sapat nan pye, te rete nan komisarya Senmak la ap tann desizyon jij la ki pat vle pran kontak ak prevni an, paske se depi lendi pase li te konvoke l.
Dwayen tribinal sivil la Mèt Ramon Guilaume presize se jij Pierre-Jules sèl, kòm moun ki reskonsab dosye a, ki gen dwa fè entèrogatwa Neptune.

Ansyen chèf gouvèlman Aristide la ki te oblije tounen Pòtoprens vandredi apremidi, anba gwo mezi sekirite PNH ak MINISTA, te kole dan sou yon ajan APENA, Rosita Joseph ki te pami moun ki t’ap veye l, nan moman li ta pral konparèt nan pakè Senmak la. Viktim nan te kouri pote plent pou mesye Neptune, touswit apre l te fin pran swen kote l te
blese a.

Yvon Neptune twouve l depi jedi nan yon kay Pako (Pòtoprens), otorite yo prezante kòm yon prizon espesyal ki sou kontwòl ajan administrasyon penitansyè nasyonal (APENA).
Yo fè konnen li fèmen nan kay sa a, ansanm ak ansyen minis enteryè li a Jocelerme Privert, ansyen kapitèn Jackson Joanis ak ansyen responsab FRAP la Louis-Jodel Chamblain.