> Kreyòl > Rekòmandasyon 10 pwen kòm egzijans pou debloke sitiyasyon an

Ayiti-Politik-Palman

Rekòmandasyon 10 pwen kòm egzijans pou debloke sitiyasyon an

Gwoup 16 la pase yon lòt vitès : Blòk ki gen majorite nan Sena a fè konnen yon nouvo gouvènman p ap ka enstale san dyalòg ak fòs politik e sosyal yo ak desizyon tankou fòmasyon konsèy elektoral pèmanan an, konsèy konstitisyonèl la, konsèy siperyè pouvwa jidisyè a, piblikasyon amandman konstitisyon an ak renouvèlman manda CIRH la

Publié le vendredi 26 août 2011

Apre rankont yo te genyen mèkredi swa ak yon gwoup diplomat ameriken, ladan yo anbasadè Kenneth Merten, manm blòk majoritè nan Sena a, gwoup 16 la, fikse pozisyon yo jounen vandredi a nan yon dokiman an 10 pwen yo prezante sou sitiyasyon politik peyi a ki sanble ak yon veritab pwogram.

Nan dokiman sa a, Senatè yo, ki deklare yon lòt fwa ankò yo pa yon gwoup blokaj, presize balon an se nan pye Prezidan Michel Martelly li ye paske se li menm ki dwe chwazi yon twazyèm Premye minis apre echèk Daniel Rouzier ak Bernard Gousse .

Gwoup 16 la, ki reprezante prensipal fòs opozisyon nan Palman an, prezante yon lis 10 rekòmandasyon ak pwopozisyon bay chèf leta a pou debloke kriz la ak fasilite adopsyon yon pak gouvènabilite. Senatè sidès Inite a, Wenceslass Lambert, pandan li t ap li dokiman an fè konnen Martelly dwe chita pale ak tout blòk palmantè yo, pati politik ki reprezante nan Palman an ak òganizasyon nan sosyete sivil la.

Sou bò pa l, Senatè Evallière Beauplan di Prezidan an gen responsabilite pou’l dyaloge ak tout sektè yo. Twazyèm Senatè nòdwès deklare li pa konprann kòman fè misye Martelly pa vle chita pale avèk gwoup ki gen majorite nan Sena a. Li pwofite di
operasyon "debloke peyi" patizan pouvwa a anonse yo pral deklannche a pap bay ankenn rezilta paske palmantè yo p ap fè bak devan responsablite yo.

Kanta pou Senatè Simon Dieuseul Desras, li lanse yon
avètisman bay tout moun ki dèyè operasyon debloke peyi a pou l di yo yo pap tolere okenn atak menm vèbal sou Senatè ak Depite.
Senatè Desras, ki elu nan Plato Santral sou banyè òganizasyon politik Lavni e ki te mennen kanpay pou chèf leta a, ajoute si gen moun ki vare sou palmantè yo yo menm y ap lanse yon operasyon "dekole" Martelly sou pouvwa a.

Pozisyon gwoup 16 la, ki vin 2 jou apre Senatè blòk sa a te fin rankontre anbasadè ameriken an, Kenneth Merten, sou sitiyasyon politik la, montre batay la sou wout pou l pran yon lòt dimansyon ant Prezidans la ak Palman an nan sitiyasyon blokaj peyi a ap viv depi plis pase 3 mwa. spp/Radyo Kiskeya