> Kreyòl > Notè Emile Giordani mouri apre bandi te fin kidnape l

Ayiti-Kidnaping

Notè Emile Giordani mouri apre bandi te fin kidnape l

Yo jwenn kadav Mèt la sou yon mòn nan zòn Kanapevè samdi maten apre 4 nèg ame te pati ak li vandredi apremidi nan kòf machin li ; lapolis toujou ap bouske yon sitwayen ameriken ki viktim zak kidnaping tou ; Senatè Edwin Zenny lonje dwèt sou ansyen Prezidan ak Senatè yo nan ensekirite a

Publié le samedi 27 août 2011

Lapolis dekouvri maten samdi a kadav notè anpil moun byen konnen nan Pòtoprens Emile Giordani, 62 zan, nan yon ravin nan zòn Kanapevè nan tèt mòn ant ri Rosa ak enpas Guercy, mwens pase 24 èdtan apre 4 bandi ame te fin kidnape l nan biwo l.

Anjandre sa yo te antre nan etid notè a kote yo te mete anba kòd plizyè kolaboratè l ki te la epi boure defen an nan kòf machin li, yon BMW plak AA07103. Se abò machin sa a yo te pati avè l.

Lapolis ak lajistis ki te debake kote yo dekouvri kò a, yo pa jwenn okenn mak bal sou Emile Giordani ki te gen figi l bande epi 2 men’l mare.

Premye eleman yo montre viktim nan ta mouri toufe nan men kidnapè yo.

Emmanuel Giordani, yon kouzen notè a, ki te prezan nan moman nèg ame yo te rantre nan biwo a, fè konnen 4 bandi yo te egzije pou yo te ba yo 80 mil dola yo te deklare ki te disponib apre mèt la ta fin fè yon afè ak yon kliyan pandan jounen an.

Mesye Giordani presize pat gen okenn 80 mil dola nan biwo a lè yo te debake a paske se toujou chèk defen an te konn fè kliyan l yo depoze labank.

Emile Giordani, ki te manm direksyon asosyasyon nasyonal notè piblik Pòtoprens yo (ASNOP), mouri kite madanm li ak 3 pitit.

Komisè gouvènman a.i Pòtoprens la, Sonel Jean-François, ki te rann li nan zòn Kanapevè a, anonse DCPJ deja louvri yon ankèt pou rive mete men sou moun ki lòtè lanmò notè a li di ki
se yon kò ansasinay.

Mèt Jean-François ajoute lajistis pap dekouraje nan aksyon l’ap
mennen kont seri krim sa yo k’ap fèt nan peyi a, otorite jidisyè yo kou
polisyè yo ap travay pou fè limyè sou tout move zak sa yo.

Premye Senatè sidès la, Edwin Zenny, pwòch Prezidan Michel Martelly, ki te rann li sou plas tou pou konstate lè dega, denonse epi kondane zak ki fèt sou notè Emile Giordani an, yon moun li te konnen pèsonèlman kòm yon moun onèt e kredib.

Palmantè a akize ansyen Prezidan yo ak palmantè yo -san l pa presize
kiyès- kòm responsab sitiyasyon ensekirite peyi a ap viv jodi a pandan l mande tèt li èske se senp aktivite kriminèl oubyen politik k ap fèt.

Kidnapè yo, ki te fè yon ralanti depi kèk jou, soti pou yo pase yon lòt vitès.

Pòtpawòl Polis Nasyonal la, komisè Frantz Lerebours, konfime an wetan kidnaping ak lanmò Mèt Emile Giordani an gen yon sitwayen ameriken, ki gen rasin li ann Ayiti, bandi kidnape depi 3 jou. Viktim nan ap travay nan yon lekòl amerikèn nan kapital la.

Anbasad Etazini an mande tout ameriken ki twouve yo ann Ayiti pou yo pran prekosyon yo. spp/Radyo Kiskeya