> Kreyòl > Martelly pwomèt non kandida pou pòs Premye minis la nan 24 èdtan

Ayiti-Gouvènans

Martelly pwomèt non kandida pou pòs Premye minis la nan 24 èdtan

Chèf leta a ta dwe anonse li chwazi doktè Gary Conille ki parèt kòm moun li prefere a

Publié le jeudi 1er septembre 2011

Prezidan Michel Martelly deklare jounen jedi a nan vil Okap Ayisyen (a yon distans 274 km Pòtoprens) nan 24 èdtan l’ap anonse ofisyèlman non nouvo Premye minis l ap chwazi a, san l’ pa presize kiyès.

Chèf leta a, ki t ap patisipe nan inogirasyon sant twomatolojik dijans OFATMA nan dezyèm vil peyi a, fè konnen li dwe rapousuiv chita pale li tanmen yo anvan desizyon an soti tout bon vre avèk posiblite pou Premye minis deziye a jwenn lese pase Palman an.

Selon dènye enfòmasyon yo, 2 kandida te gen non yo sou lis la, doktè Gary Conille ak ekonomis Wilson Laleau. Men, premye a ta gen yon bèl avans sou dezyèm nan.

Prezidan Sena a, Rodolphe Joazile, ki, ansanm ak prezidan Chanm Depite a, Sorel Jacinthe, rankontre Martelly plizyè fwa, fè konnen se sòv yon aksidan sèlman pou ki ta fè Prezidan an chanje lide apre l fin anonse yo se mesye Conille li chwazi.

Premye senatè sidès la, Edwin Zenny, ki viv pre Michel Martelly, te parèt pi prese pase Chèf leta a lè l deklare jounen jedi a menm nouvèl ofisyèl sou chwa medsen an, li apiye nèt alkole, ta kapab pran lari. Palmantè a di Gary Conille, yon fonksyonè 45 lanneNasyonzini ann Afrik e ansyen chèf kabinè Bill Clinton, kòm yonn nan 2 prezidan CIRH yo, ap prepare dosye l pou, sizoka se li menm Prezidan an chwazi, li parèt kòrèk devan Palman an.

Edwin « Edo » Zenny mande davans pou Senatè parèy li yo ak Depite yo aksepte ratifye Conille pou l vin tounen nouvo Premye minis peyi a dekwa pou yon gouvènman pran mayèt la pou l kòmanse rezoud pwoblèm popilasyon an ap fè fas jodi a. spp/Radyo Kiskeya