> Kreyòl > Lapolis mete men sou yon gwo sispèk nan lanmò Me Emile Giordani

Ayiti-Ensekirite

Lapolis mete men sou yon gwo sispèk nan lanmò Me Emile Giordani

Yon lòt pa, pòtpawòl PNH la, Frantz Lerebours, akize sekirite Bank santral yo dèske yo egzekite polisye Hudson Jacinthe pandan yon michan ensidan vandredi

Publié le dimanche 4 septembre 2011

Konsènan lanmò notè Emile Jordani, ki te rive senmennn pase a pandan yo te kidnape l, pòtpawòl Polis Nasyonal la, komisè Frantz Lerebours deklare lapolis mete men sou yon gwo bandi ki ta gen men’l tranpe nan zak sa a, se Jean Sébastien Lazarre , 22 lanne, ki esplike yo te mennen operasyon an ak konplisite 3 gadyen ki tap travay nan biwo notè a.

Pòtpawòl la kontinye pou l di gang ki touye Mèt Giordani an gen 5 moun
ladan’l pou pipiti. Anvan menm yo te arete Lazarre, lapolis te gentan arete yon lòt bandi ki rele Ti Pouchon. Frantz Lerebours fè konnen y ap kontinye bouske tout moun ki patisipe nan gwo zak kriminèl sa a.

Yon lòt pa, pòtpawòl Polis Nasyonal la deklare polisye Hudson Jacinthe
viktim yon egzekisyon nan Bank santral jounen vandredi a kote li te nan gwo akwochay ak ajan sekirite yo, ki se ansyen militè, pandan l te al chanje chèk li. Komisè Lerebours fè konnen tout endis lapolis syantifik gen nann men’l, pwouve se egzekite yo egzekite polisye a.

Li kwè li rive yon moman pou otorite yo mete lòd nan fason ajan sekirite yo ap fonksyone nan Bank santral la paske se pa premyè fwa gen pwoblèm ant polis ak sèvis sekirite a. Komisè a di sak rete pou fèt se idantifye ki ajan ki te tire a paske krim sa a pa fouti rete san pinisyon. spp/Radyo Kiskeya