> Kreyòl > Kandida Premye minis la renmèt Depite yo pyès li

Ayiti-Palman-Ratifikasyon

Kandida Premye minis la renmèt Depite yo pyès li

Doktè Garry Conille, ki kwè li gen chans pou l monte alatèt pwochen gouvènman an, deklare li pare pou l pote kole ak tout moun

Publié le jeudi 8 septembre 2011

Premye minis deziye a, doktè Garry Conille, deklare li trè konfyan apre l fin depoze pyès li apremidi jedi a devan vis prezidan Chanm Depite a pou sèvis seyans, depite Tigwav la, Stevenson Thimoléon, ann absans prezidan an, Sorel Jacinthe.

Doktè Conille, ki te rankontre komisyon ki gen pou etidye dosye l la, pa presize ki kalite pyès li depoze devan biwo chanm depite a. Li sèlman di li bay tout pyès li yo.

Kandida a, ki montre li gen konfyans lap rive jwenn lese pase asanble a apre rekòmandasyon komisyon an, nan premye etap pwosesis ratifikasyon an, anonse entansyon l pou l travay ak tout sektè pou ansanm yo kòmanse leve defi pwoblèm peyi a.

Sou bò pa l, prezidan komisyon espesyal ratifikasyon an, Depite Levaillant Louis-Jeune, fè konnen li pokò gen pyès yo nan men l, se jounen vandredi a lap resevwa yon nan men biwo Chanm nan. Palmantè a, ki pa fikse ankenn dat pou komisyon an remèt rapò li, prevwa sa kapab fèt pètèt nan finisman senmenn pwochèn nan paske yo pa vle fè ankenn travay bouyi vide.

Apre komisyon an fin analize dosye Dr Conille nan, l ap gen pou l fè
asanble a rekòmandasyon sou vòt depite yo ta dwe rezève pou kandida a, selon Depite Levaillant Louis-Jeune.

Premye Senatè lwès la, Steven Benoît, ki te prezan nan moman depo pyès yo, anonse palmantè Altènativ yo pare pou yo vote Garry Conille kòm Premye minis depi dosye l konfòm ak egzijans atik 157 konstitisyon an.

Benoît, ki gen kèk jou depi l te plonje nan yon gwo silans,
kwè premye etap ratifikasyon an dwe debouche sou yon vòt teknik kontrèman a kòlèg li yo nan gwoup 16 la ki pale de vòt politik nan tout etap pwosesis la.

Nap fè konnen premye minis deziye a, plizyè ajan USGPN tap bay sekirite, te genyen nan staf li ansyen minis jistis rejim Lavalas la, Mèt Garry Lissade, ki se tou manm CIRH la, ak doktè Emile Hérard Charles, responsab fon mondyal nan fondasyon Sogebank epi ansyen direktè jeneral ministè sante piblik ak popilasyon toujou sou rejim Lavalas la. spp/Radyo Kiskeya