> Koneksyon > Wòl teknoloji nan denonse vyolans seksyèl sòlda irigweyen MINISTA

Koneksyon ak Gotson Pierre

Wòl teknoloji nan denonse vyolans seksyèl sòlda irigweyen MINISTA

Teknoloji a nan kè aktyalite ki konsène Ayiti jounen jodi a. N ap pale sou kadejak san parèy sa a, sòlda irigweyen fè nan finisman mwa jiyè sou yon jèn ti gason 18 an nan Pò Sali, nan sid peyi a.

Publié le mercredi 14 septembre 2011

Nou tout konnen déjà kouman zafè sa a rive pran lari. Se apati yon fim yonn nan patisipan nan fòfè a fè ak pwòp telefòn pòtab li.

Enfòmasyon yo fè konnen, yonn nan kadejakè yo te remèt telefòn ki gen fim la ladan l bay yon kouzen viktim nan pou kab fè echanj mizik. E, se lè sa a kouzen an al pantan sou fim makab sa a, dapre temwayaj li bay nan medya. Li tou kapte l sou telefòn pa li epi nan montre lòt moun epi nan pataje, li chape.

Videyo sa a ki fè moun anvi vomi pou zak sal yo wè ladan li, sanble te soti pou premye fwa sou chèn ABC nan Etazini.

Men, premye kote li poste nan Entènèt ayisyen an, se nan ajans Haiti Press Network, ki pami premye medya ki revele nouvèl la.

Videyo a tèlman di pou moun gade, ke menm Youtube pa aksepte l. Responsab HPN yo konfye nou, yon moman apre yo fin poste yon estrè nan videyo a sou Youtube, platfòm videyo mondyal la bloke l.

Malgre konfrè yo te efase pati ki pi ensipòtab nan videyo a, Youtube bloke l epi li bay HPN sanksyon. Li retire dwa ajans la pou poste videyo sou platfòm sa a pandan 6 mwa.

Gen moun ki poze pwoblèm etik. Deba kab fèt sou sa epi li nensesè menm pou deba fèt sou sa.

Sepandan, se kanmem yon aksyon ki te enpòtan pou tout devlopman nou vin wè apre yo.

Konfrè nou yo rekonèt se domaj non viktim nan ak vizaj li soti nan piblik, men anmenmtan se sa ki ouvè je moun sou zak atoufè yo epi ki retire tout posiblite pou moun ki an kòz vin demanti sa.

Mwen panse li te nesesè pou souliye wòl nouvèl teknoloji yo nan denonse de skandal tankou sa nou sot wè la a, e gen plizyè fenomèn pou nou mansyone.

Dabò, vle pa vle, sou teren an, e pa sèlman Pòtoprens gen yon veritab abitid epi yon metriz teknoloji yo k ap devlope piti piti.

Ansuit, menmsi pou kounye a yo pa gen yon odyans dirèk dirèk ki lajman laj menm jan ak radyo paregzanp, men enpak y opa neglijab nan fason y ap kontribye pou kouvri aktyalite a.

Reskonsab HPN yo fè konnen se anviwon 15000 moun ki wè estrè videyo krim nan dirèkteman sou sit ajans la nan 4 jou. San konte lòt valè moun ki al gade l san pase pa ajans la.

Lòt aspè se jan pawòl la gaye san li pot ko pase nan medya tradisyonèl yo. Sa raple nou Entènèt la ap naje nan yon kilti oral an Ayiti. Trè vit radyodyòl la kab tounen twitèdjòl oubyen facebookdyòl.

Tou sa pou di, Ayiti kab fè plas li nan inivè teknolojik la, si gen dispozisyon estratejik Leta ki an plas pou sa.

Nou pap bliye, peyi a ki gen 1 milyon entènot ladan, se peyi kote Entènèt la devlope pi vit nan dènye ane sa yo nan tout rejyon Karayib la.

………………

Jisteman, sou kesyon devlopman Entènèt, yon nouvo konpayi monte teren an. Sèvis li sanse inogire apati dezyèm semèn septanm sa.

Natcom se konpayi ki ranplase ansyen konpayi nasyonal telekominikasyon an Teleco.

An me 2010, administrasyon ansyen prezidan René Préval la vann konpayi vyetnamyen Viettel 60% nan aksyon Teleco pou 59 milyon dola.

Natcom tanmen goumen pou fè plas li sou teren an ak sèvis yo espere ki kab ogmante konkirans nan sektè a.

Natcom sibi anpil sabotaj nan semèn pase yo, dapre sa reskonsab yo fè konnen epi koneksyon li ak lòt konpayi yo poko fin fèt.

Dikskisyon ap fèt toujou ak Digicel. Komisyon kominikasyon nan sena a foure bouch nan koze a epi anonse yon premye akò ta dwe fèt ant 2 konpayi yo nan mitan mwa septanm nan.

…………………

Epi nou kontan anonse w, anplis 88.5 la ak Podcast sou Entènèt, koneksyon ap pase kounye a nan rezo radio kominotè yo, granmesi yon patenarya ak Sosyet Animasyon ak Kominikasyon Sosyal (SAKS). Nou pwofite salye tout oditè ak oditris ki resevwa ribrik sa a atravè radyo kominotè yo nan tout peyi a.

Koneksyon, Gotson Pierre

Ou kab rekoute ribrik sa a sou podcast Radyo Kiskeya www.radiokiskeya.com
Nan rezo radyo kominotè yo ak konkou SAKS
Epi pou nou kenbe kontak, adrès elektwonik mwen se :
gp@medialternatif.org
Facebook : www.facebook.com/gotson.pierre
Twitter : http://twitter.com/gotsonpierre