> Kreyòl > Depite yo konvoke vandredi pou ratifikasyon Garry Conille

Ayiti-Palman-Gouvènans

Depite yo konvoke vandredi pou ratifikasyon Garry Conille

Anvan menm komisyon espesyal la te renmèt rapò li jedi nan mache prese, GPR ak gwoup 16 la, ki rasanble pou pifò palmantè INITE nan Chanm Depite a ak Sena a, te deja montre yo pare pou yo vote kandida Premye minis la pandan yo mande pou pyès li yo tonbe daplon ak konstitisyon an

Publié le jeudi 15 septembre 2011

Seyans ratifikasyon Premye minis deziye a, Gary Conille, fikse pou jounen vandredi a nan chanm Depite a apre komisyon espesyal ki t ap analize dosye kandida a fin renmèt rapò li, selon prezidan biwo Chanm nan, Sorel Jacinthe.

Nan yon nòt pou laprès li mete deyò nan finisman apremidi jedi a, Depite Moron/Chanbelan an (Grandans, sidwès) envite tout kòlèg li yo nan seyans k ap fèt pou prezante, diskite ak vote rapò a.

Dènye kout volan sa a montre volonte palmantè yo pou yo mete yon gwo vitès siperyè nan pwosesis ratifikasyon doktè Conille an, yon bagay ki te gentan parèt klè depi plizyè jou davans.

Depite A. Rodon Bien-Aimé, ki pase nan eleksyon sou banyè ansyen platfòm prezidansyèl la INITE nan Cerca Carvajal (Plato Santral, sant), anonse l’ap vote an favè Garry Conille yon fason pou prese prese peyi a ka gen yon nouvo gouvènman alatèt li.

Kanta pou Depite Bainet a, Malherbe François, ki plante poto l tou nan INITE ak gwoup palmantè renouvo (GPR), li deklare blòk la deja gen pozisyon l sou dosye premye minis deziye a apre yo fin fè plizyè rankont sou sa. Depi pyès Gary Conille yo konfòm ak konstitisyon an, palmantè GPR yo ap vote pou li san kondisyon.

Depite François presize GPR pap mande pòs minis ak direksyon jeneral, men, Depite l yo egzije sèlman pou yo jwenn sa l rele yon "vizibilite politik nan sikonskripsyon yo".

Sou bò pa l, gwoup 16 la, ki gen majorite a nan sena repiblik la, te gen yon rankont jounen mèkredi a avèk Prezidan Michel Martelly nan rezidans ofisyèl Premye minis ki prale a, Jean Max Bellerive, dapre Senatè Simon Dieusseul Desras.

Li fè konnen rankont sa a te dewoule sou dosye premye minis
deziye a, Gary Conille, ak sou divès pwen ki nan dokiman gwoup 16 la te pwopoze chèf leta a dènyèman pou fasilite deblokaj sitiyasyon politik la. Desras presize Prezidan Martelly te mande gwoup 16 la pou’l sipòte kandida l la "tèt kale", men, yo reponn li yo kapab pètèt apiye l "je kale". Nan sans sa a, palmantè a di depi tout kondisyon yo ranpli y’ap vote anfavè Conille.

Li kouri ajoute gwoup 16 la pap fè okenn kòmantè sou dosye sa a pou kounyeya paske se sèlman lè vòt la pral fèt la l ap gen pou l fikse pozisyon l. spp/Radyo Kiskeya