> Kreyòl > Victor Benoît pa gen pwoblèm ak chwa Conille an, men, li sezi zewo fot Depite (...)

Ayiti-Politik

Victor Benoît pa gen pwoblèm ak chwa Conille an, men, li sezi zewo fot Depite yo

Dirijan pati Fuzyon sosyal demokrat yo mande, yon lòt pa, pou Prezidan Martelly korije erè li komèt nan nominasyon nouvo direktè jeneral yo

Publié le samedi 17 septembre 2011

Prezidan pati Fuzyon sosyal demokrat yo, pwofesè Victor Benoît, deklare samdi li pa gen pwoblèm ak chwa Garry Conille an, men, li pat atann li premye minis deziye a tap soti ak yon nòt 100 sou 100 nan pwosesis ratifikasyon an nan Chanm Depite a, jan sa rive vandredi a.

Nan yon entèvyou li bay Radyo Kiskeya apre yon bon tan absans nan peyi a, mesye Benoît presize nan direktwa Altènativ la yo te fè yon rankont kote yo te jwenn yon antant ak palmantè yo pou yo te respekte pozisyon komisyon palmantè ki tap etidye pyès doktè Conille yo. Men, se pat yon lòd yo te pase yo, se te pito yon desizyon tèt ansanm ki te pran.

Yon lòt bò, dirijan sosyal demokrat la, ki rekonèt dwa Prezidan Michel Martelly pou li nonmen delege depatmantal yo ak direktè jeneral yo, kwè chèf leta a fè yon erè paske li ale twò vit nan divès nominasyon ak enstalasyon li fè yo. Li mande mesye Martelly pou li korije erè sa a. konsa, lè gen yon nouvo kabinè ministeryèl li ta dwe soti yon arete ki gen anba l siyati minis yo pou direktè tounèf ki sou zòd yo. spp/Radyo Kiskeya