> Kreyòl > Ratifikasyon politik jeneral Conille fikse pou jedi nan Sena (...)

Ayiti-Gouvènman

Ratifikasyon politik jeneral Conille fikse pou jedi nan Sena a

Selon prezidan Sena a, Rodolphe Joazile, se paske tèks Premye minis ratifye a pa rive a tan nan Sena a ki fè yo oblije ranvwaye seyans la ki te dwe fèt mèkredi ; gwoup 58 la, ki gen majorite nan Chanm Depite a, kanpe an zo blod lè l fè Garry Conille plizyè egzijans pou evite yo "achte chat nan makout"

Publié le mardi 11 octobre 2011

Seyans ratifikasyon deklarasyon politik jeneral Premye minis ratifye a ap derape finalman jedi ak yon premye randevou nan Sena a Prezidan, dapre prezidan Chanm nan, Jean Rodolphe Joazile, ki fè konnen Garry Conille te ekri biwo a pou li te mande pou seyans la fèt jounen mèkredi a.

Dezyèm Senatè nodès la presize tèks deklarasyon politik jeneral la potko rive nan Palman an jis nan mitan jounen madi a se sa ki fè biwo sena a sètoblije mete seyans la pou jedi. Mesye Joazile ajoute Senatè yo swete jwenn dokiman an nan men doktè Garry Conille pou pi piti 24trèdtan anvan seyans ratifikasyon an.

Pi lwen, prezidan Sena a deklare sou baz elegans politik li menm ak kolèg li yo te swete pou se te Chanm depite a ki te tande anvan kisa Premye minis ratifye a pote nan djakout li. Men, bout pou bout yo chanje pozisyon paske Garry Conille te ekri gran kò a pou mande l resevwa l an premye pou prezantasyon deklarasyon politik jeneral li a. Senatè Joazile fè konnen nouvo Premye minis la ap bezwen 16 vwa pou pi piti pou politik jeneral li a kapab pase.

Li souliye si asanble a ta voye dokiman an jete, Garry Conille pral korije kaye l pou’l vin reprezante politik jeneral li devan senatè yo aloske gen palmantè ki kwè depi deklarasyon politik jeneral la pa jwenn viza nan yonn nan Chanm yo, Premye minis la ap tou tonbe.

Pandanstan, sitiyasyon an pa klè ditou nan Chanm depite a pou mesye Conille akoz gwoup 58 la, ki gen majorite a, fikse plizyè kondisyon ki dwe ranpli anvan prezantasyon politik jeneral la. Yonn nan gwo manm gwoup la, Depite Lewogàn nan, Danton Léger, di yo egzije pou yo ba yo tèks la yon semèn anvan seyans la pou yo kapab fouye l, analize l an pwofondè.

Palmantè a fè konnen tou yo vle gen lis minis ak sekretè deta ki pral fè pati gouvènman an anvan seyans ratifikasyon an paske yo pap aksepte pou gen moun enkonpetan oubyen dosye yo gen pwoblèm nan pwochen gouvènman an. Mèt Danton Léger, ki eli sou banyè Ansanm Nou Fò, dekalre manm gwoup 58 la vle gen yon prezans politik nan sikonskripsyon yo, sa fè yo swete patisipe nan chwa vis delege yo ak nan ranplasman konsèy kominal yo ki gen manda yo bout. spp/Radyo Kiskeya