> Koneksyon > Blakawout nan sistèm BlackBerry-a

Koneksyon ak Gotson Pierre ansanm ak Harold Isaac

Blakawout nan sistèm BlackBerry-a

Google vle ranplase bous

Publié le mardi 18 octobre 2011

Moun ki sèvi ak telefòn Black Berry nan dives kontinan atravè lemond te nan cho pandan jounen fatidik 10 oktòb la. Se te yon jounen terib tou pou konpayi kanadyen Research In Motion (RIM) ki fè pwodui sa a, e ki gen gwo siksè atravè lemond.
Siman oumenm ou kab te santi sa lè w eseye voye mesaj imel ak mesaj enstantane BBM (BlackBerry Messenger), sa pa mache. Gen moun kif è nou konnen jiskaprezan yo rankontre kèk difikilte toujou.
Antouka, pandan plizyè èdtan, sèvis imel ak mesaj enstantane BBM ki konekte plizyè milyon moun atravè lemond, atravè yon kanal privilejye, rete konsa yo pa mache.
Dapre jounal angle The Guardian, pwoblèm nan ta soti nan yon sèvè BlackBerry ki tabli an Angletè. Sèvè a tonbe an pàn.
Madi 12 oktòb, yon pòtpawòl kanadyen BlackBerry deklare pwoblèm nan rezoud apre yo fin fè entèvansyon ijan sou sèvè a, epi li prezante eskiz li bay kliyan yo.
Analis yo fè remake, pàn sa a rive nan yon move moman pou “Research In Motion”. Konkirans lan rèd ak lòt mak k ap vale teren sou mache a, tankou Apple, Samsung, oubyen Motorola, pou nou site sa yo sèlman.
Se nan menm moman sa a tou, gen dwèt ki koumanse ap lonje sou “Research In Motion” pou move pratik lit a devlope. Yo sispèk “Research In Motion” ta kolabore ak kèk gouvènman pou pèmèt yo jwenn done ki konsène itilizatè system nan.
Denonsyasyon an serye. Se Reporters Sans Frontières (RSF) limenm ki denonse pratik sa a. RSF fè konnen konpayi fè antant ak kèk gouvènman nan fè nwa pou pataje done itilizatè yo ak yo.
RSF site « Émirats arabes unis » ak « Arabie saoudite » kòm peyi ki jwenn akò sa a ak Black Berry.
Yo fè konnen tou, nan gwo leve kanpe ki te gen nan « Londres » nan mwa out pase a, Blak Berry te kolabore ak gouvènman britanik la lè li t ap chèche reprime manifestasyon yo, pandan manifestan yo t ap sèvi ak rezo BB a pou kominike.
Aktyèlman RIM ap sibi presyon nan men sèten gouvènman pou ouvè rezo BB a, men RSF mande l reziste, toujou kenbe prensip pou pwoteje done pèsonèl yo epi sekrè mesaj yo.
…………….
Sanble definitivman nou nan yon mache prese pou antre nan yon mond vityèl nèt, Harold

Gotson semèn pase-an ou tap pale nou, anvan anons kokenn chenn nouvèl lanmò Steve Jobs lan, de disparisyon papye jounal anvan lontan.

Imajine w’ ke se pa sèl bagay ki riske disparèt nan toubiyon teknolojik ki ap travèse planèt-la.

Pwochen kandida-a ? Bous.

Wi, jan ou tande l’ lan Gotson. Objektif Google, se pèmèt ou leve yon maten epi sòti ak telefòn sèlman nan men w’ san bous.

Yon lide moun fou ? Se pa sèten. Sitou lè ou gade valè bagay telefòn deja ranplase : Ke wap pale de mont, lektè MP3, kalandriye, bousòl, jounal, kamera foto videyo e latriye

Vrè kesyon se pito ki valè lòt bagay telefòn lan va kapab ranplase.

Si ou gen yon dout map raple w’ ke menm an Ayiti nou kòmanse peye ak telefòn. Men nan menm souf lan, fòk risk yo byen mezire pou yon moun pa tou fè kè jou li pèdi telefòn li.

Pou plis detay, chèche Google Wallet se Wallet

Pou Koneksyon, sete Harold

Mèsi Harold

…………………
An n mete de pye nou atè. Atè Jamayik, kote konpayi Digicel pwomèt otorite jamayiken yo tout api yo pou wè si peyi sa a ta tounen yon peyi lidè nan zafè Teknoloji Kominikasyon ak Enfòmasyon nan Karyib la.
Plas Jamayik, se pa pou li suiv lòt peyi. Se pou li mache devan, dapre sa Colm Delves, chef Digicel Group lòt bò a fè konnen semèn sa a.
Li fè remake, diferans ant peyi k ap mache dèyè ak sa k ap mache devan, se say o rele inovasyon teknolojik. Jamayik mèt konte sou api Digicel Group la pou antre fon nan inovasyon teknolojik, dapre asirans Delves bay.
Yon pwomès serye oubyen yon kout maketin ?