> Koneksyon > Yon kòlòk sosyal an dirèk sou Entènèt

Koneksyon ak Gotson Pierre ansanm ak Harold Isaac

Yon kòlòk sosyal an dirèk sou Entènèt

Yon lòt mapou tonbe nan mond enfòmatik la

Publié le mercredi 26 octobre 2011

N ap prezante w koneksyon an dirèkteman de yon otèl nan Petyonvil kote yon kolòk ap fèt semèn sa a sou Dwa pou moun jwenn lojman, dwa pou peyizan jwenn tè pou travay. Se yon kolòk yon dizèn òganizasyon de baz nan peyi a òganize sou labèl Je nan Je. Yo jwenn konkou yon òganizasyon entènasyonal ki rele Action Aid.

Nan nivo teknolojik, sa ki enteresan nan aktivite sa a, se difizyon an dirèk ki fèt sou Entènèt.

Mwen mande Garry Francois, Responsab enfòmatik nan Action Aid, kouman sa fèt ?

Adrès pou suiv oubyen resuiv kòlòk sa a sou Entènèt se www.livestream.com/jenanje
…………

Kounye a direksyon Kanada. Harold w ap pale nou sou yon lòt mapou ki tonbe nan mond enfòmatik la.

Gotson, se pa sèl Steve Jobs nou pèdi kòm moniman nan domèn enfòmatik lan nan de dènye semèn ki sot pase la yo.

Dènye mapou ki tonbe an rele Dennis Ritchie. Ou gen dwa pa konnen l’, anfèt mwen sèten twaka nan oditè nou yo pa konnen misye. E poutan…

Mwen sèten chak jou nou sèvi ak travay misye. E tankou anpil moun di li, si enfòmatik jan li ye jounen jodi-a se paske li chita sou zèpòl Dennis Ritchie.

Men kisa nou dwe Dennis Ritchie, egzakteman ?

Eben Gotson, pou nou di li trè senpleman, nou dwe Dennis Ritchie langaj pwogramasyon C.

Kisa C an ye ? Eben se langaj ki alabaz preske tout lojisyèl ak systèm operasyon ki ap fonksyone aktyèlman. Ke se Windows, ke se Mac, ke se Linux, ke se UNIX.

Si Steve Jobs ak Bill Gates reprezante gwo moso vizib enfòmatik lan, Dennis Ritchie se li menm ki dèyè yon gwo pòsyon sa ki envizib e ki se nannan entènèt ak enfòmatik lan an jeneral.

Dennis mouri a laj 70 zan, 12 oktòb ki sot pase la, yon semèn pye pou pye apre Steve Jobs. Ochan pou de toro sa yo.

Pou plis detay chache Dennis Ritchie se Dennis Ritchie

Pou Koneksyon, sete Harold

Mèsi Harold
…………..
Ou se paran. Ou toujou gen tèt chaje sou fason ti moun yo ap itilize entènèt. Pafwa ou preyokipe pase ou pa konn sa k ap pase. Ou santi w manke kontwòl. Men yon sit pou cheke www.info-familles.netecoute.fr. N a gen tan pale pi plis sou sa.