> Kreyòl > Reyaksyon anbasadè Ruben Silié sou ka minis Supplice la

Se pa ni polisye ni militè dominiken ki atake minis Supplice

Reyaksyon anbasadè Ruben Silié sou ka minis Supplice la

Lapolis dominiken louvri yon ankèt

Publié le mardi 27 décembre 2011

Anbasadè dominiken an ann Ayiti, Ruben Silié, fè konnen se avék anpil tèt chaje li aprann nouvèl atak minis ayisyen kap viv aletranje yo, Daniel Supplice, te viktim ak fanmi l nan peyi repiblik Dominikèn semen pase ya. Selon anbasadè Silié, se yon gwoup bandi ki espesyalize yo nan ransonnen moun nan pati sid peyi ya kap pase nan machin yo konstate ki gen gwo mwayen. Konsènan nòt chanselri ayisyèn nan mete deyò, anbasadè Silié deklare se dwa otorite ayisyèn yo pou yo egzije sekirite pou resòtisan yo, men li presize, Daniel Supplice se nan yon vizit prive li te ye, se pa minis lan ki sibi atak la.Reprezantan gouvènman Léonel Fernandez voye jete byen lwen enfòmasyon ki fè kwe se polisye dominiken ki komèt zak sa, selon li se pa ni lapolis ni lame ki fè aksyon sa a. Li anonse gen yon ankèt lapolis dominikèn deja louvri pou fè limyè sou dosye a.

Sepandan, selon jounal Listin Diario gen yon polisye ann aktivite ak yon ansyen polisye pami twa moun lapolis arete nan kad zafè sa a.

Ensidan ki rive minis ayisyen kap viv a letranje yo, Daniel Supplice ak fanmi li, an repiblik Dominikèn, se yon souflèt pou relasyon kap devlope ant 2 pèp yo, se sa pè Yves Edmond ki se responsab Sant Pon deklare nan yon inteviou li bay Radio Kiskeya. Pè Yves Edmond fè konnen, se akòz neglijans otorite ayisyèn yo ki pa janm pran dispozisyon pou kondane zak sa yo ki lakoz ayisyen toujou ap viktim lakay vwazen. Selon pè Yves Edmond ensidan sa a se yon okazyon an plis pou otorite ayisyèn ak dominikèn yo poze pwoblèm migrasyon ki genyen ant de peyi yo, anpil ayisyen toujou viktim. Responsab sant pon Ayiti voye senpati l bay mesye Supplice ak tout fanmi l ki viktim anba men polisye dominiken.