> Koneksyon > Kisa 2012 ap pote nan nivo miltimedya ?

Kronik Teknolojik Koneksyon ak Gotson Pierre epi Harold Isaac an patenarya ak Gwoup Medialternatif

Kisa 2012 ap pote nan nivo miltimedya ?

LG ap prezante yon ekran OLED 55" nan CES Las Vegas

Publié le jeudi 12 janvier 2012

Yon lòt fwa bòn ane teknolojik pou tout oditè ak oditris Radyo Kiskeya, espesyalman tout fanatik Koneksyon, ki swete kontinye fè chemen an ak nou pandan l ap enfòme nou ak entèlijans sou aktyalite miltimedya ak teknoloji.

Lòt jou se te moman bilan. Dayè, daylòg konplè mwen te fè ak Harold sou ane 2011 la, disponib an podcast sou sit radyo a. Jodi a nou enterese konnen sa 2012 ap pote. Nou pa divinò. Lasyans pa mache ak devinèt. Men li kab sèvi ak ipotèz ki baze sou yon seri tandans k ap parèt.

Se konsa, sou plizyè sit espesyalize, yo koumanse ap gade ki wout revolisyon teknolojik nou ladan l la pral pran.

Kèk inovasyon ap domine previzyon yo. Dapre anons gran konpayi tankou Google, Apple ak Sony fè, ekran televizyon nou gen nan salon nou pral satisfè plis anvi nou. Y ap reyini alafwa televizyon, Entènèt, mizik, foto, videyo…

Men tou, ekran n ap pale a, li ka vin tankou yon fèy papye… Harold va di nou talè.

Aparèy ki resevwa kontwòl vokal koumanse layite ak iPhone. Tandans sa a pral kontinye, dapre espesyalis yo. E, ane sa a, nou kab koumanse dyaloge ak sèten lòt aparèy n ap sèvi, tankou televizyon.

Tablèt yo ap fè pale de yo depi kèk tan, men pri yo toujou rete wo. Sanble nou ta dwe wè ane sa a, yon mini iPad, ki vann mwen chè… Mini toujou ? Kesyon ap poze : ki diferans n ap fè ak telefòn pòtab ?

Sou telefòn pòtab, ane 2012 la ap pote plis fonksyon toujou. An Ayiti, nou déjà fè esperyans telefòn pòtab kòm kanè bank. Gen kote yo sèvi ak li pou peye transpò piblik, menm jan ak pou peye antre nan kèk espektak. Yo prevwa devlopman « MCommerce » oubyen « commerce mobile ».

Pami rezo sosyal yo, jan nou konnen, Facebook pral antre nan bous ak yon valè 100 milya dola. Sepandan, yo prevwa Twitter ki gen plis pase 200 milyon kont sou li, kapab esploze. Aktyèlman se plis jounalis ak amatè teknoloji ki itilize l. Politisyen pral foure pye yo sou li pi rèd epi petèt biznis tou.

Jan m di nou, gen plizyè analiz ak previzyon k ap fèt. Patikilyèman sou devlopman rezo sosyal yo, gade sou http://thenextweb.com
……………
Alòs, kounye a, n ap pase kòn nan bay Harold. Bòn ane Harold.

Bòn ane Gotson, 2012 lan ap kòmanse an lyon ak konpayi LG (Lucky-Goldstar) ki prèt pou anonse nan gwo oumble elektronik CES lan nan Las Vegas, pwodiksyon yon ekran OLED 55" lajè.

Kisa ekran OLED lan ye ? OLED-lan ki vle di Organic Light Emitting Diode, se yon teknoloji revolisyonè ki deja gentan ap chanje figi ekran plat yo.

Li pèmèt ekran yo vinn pi plat, pi flexib (Ou kapab menm ploye yo), pi lejè, mwen chè epi koulè yo vinn pi bèl.

Sa ki pi rèd lan, anvan lontan,ekran sa yo gendwa menm vini nan yon po penti pou pentire mi lakay pou gade televizyon.

Sa nap gade la se koumansman yon gwo chanjman nan tout sa ki konsènen videyo ansanm ak jan nap gade yo.

Pou Koneksyon, sete Harold

Mèsi Harold
……………….
Kanal Frans Entènasyonal (CFI) ak Asosyasyon Tinizyen pou Libète Nimerik pami asosyasyon k ap òganize yon kòlòk 12 ak 13 janvye sou wòl jounalis sitwayen nan Tinizi. Se premye kòlòk konsa k ap òganize depi diktati a fin bat ba nan peyi sa a. Nou konnen nan evenman sa yo rezo sosyal yo te jwe gwo wòl.
Pami pwen y ap abòde y ap panche sou wòl nouvo medya nan nouvèl reyalite Tinizi a, menm jan tou y ap pale sou wòl blogè ak “cyber activistas”.
Gen de gran non pami entèvenan yo, tankou Pierre Haski, prezidan ak manm fondatè sit franse « Rue 89 » ak Francis Pisani, blogè ak jounalis fransè yo konnen nan nivo entènasyonal.
………….
Anvan m ale, ban m di nou sou adrès twitter ak FB mwen, mwen resevwa plizyè post mwen pataje pandan jou sa yo.
Yonn nan yo ki soti bò kote Alves Rosental, ki rapòte apati yon konferans l ap patisipe ladan : « nou fèk koumanse nan revolisyon dijital la, piske, sa te 50 an pou liv te vin gen fèm li genyen kounye a ».
Identifikasyon Twitter misye, se @rosental.