> Koneksyon > Rezo sosyal yo bay mouvman demokratik nan peyi Siri a jarèt

Kronik Teknolojik Koneksyon ak Gotson Pierre epi Harold Isaac an patenarya ak Gwoup Medialternatif

Rezo sosyal yo bay mouvman demokratik nan peyi Siri a jarèt

Chanjman nan tèt RIM

Publié le jeudi 2 février 2012

Plas Teknoloji enfòmasyon yo nan gran mouvman sosyal ki mennen kokenn chanjman nan peyi arab yo toujou rete yon sijè aktyalite.

Apre Ejip ak Tinizi, de nan ka yo plis diskite, kounye a y ap pale anpil tou sou Siri, kote mouvman yo pran chè pou mete do rejim Bachar El Asad la atè.

Rejim nan kontinye ap ap kenbe nan yon anbyans vyolans, malgre mouvman manifestasyon pa bat ba. Sèten nan figi yo pi konnen nan rezo sosyal yo epi ki enplike nan batay demokratik la blije pran egzil.

Se ka blogè siryen Shakeeb Al-Jabri, ki table nan Bewout, Liban, kote li lage kò l nètalkole nan batay kont rejim Assad la, atravè Entènèt.

Nan entèvyou li bay jounal “Now Lebanon”, li esplike kouman mouvman k ap devlope nan peyi li a konte anpil sou medya sosyal yo.

Tande sa li di : “pou òganize yon manifestasyon, yo kreye yon gwoup Facebook. Pou pibye enfòmasyon sou sa y ap fè yo kreye yon kont Twitter. Pou yo kominike ak lòt militant, yo itilize Skype. Pouf è lemond antye wè sa k ap pase, yo itilize Youtube. Si se pat sa, revolisyon an t ap deja kraze”.

Men, Shakeeb Al-Jabri fè konnen, yonn nan pi gwo pwoblèm blogè siryen yo, se rive jwenn enfòmasyon epi verifye enfòmasyon yo anvan yo difize yo.

Gen yon lòt defi enpòtan : se 15% syryen yo sèlman ki konekte sou Entènèt. Gen moun nan popilasyon sa a ki pa janm menm wè yon òdinatè.

Entèvyou Shakeeb Al-Jabri a soti nan jounal libanè “Now Lebanon”. Revi franse Courrier International reprann li. Adrès la se : www.courrierinternational.com

Kont Twitter Shakeeb Al-Jabri se @LeShaque

……………

Boulvès nan Reschearch In Motion (RIM), konpayi ki fè telefòn Black Berry yo, se yon feyton k ap kontinye. Nouvo chapit, Harold.

Efektivman Gotson, sa ki te enpansab gen apèn 1 an de sa, finalman rive semèn sa lè 2 toro gwonde BlackBerry yo, Jim Balsilli ak Mike Laziridis fè bèk atè apre 20 an yo pase ap mennen bak konpayi yo te fonde-a.

Presyon-an te vinn twòp pou mesye yo ki pa reyisi chanje kap konpayi-an. Aksyon Research In Motion lan pèdi 75% lavalè nan dènye ane ki sot pase la.

Tankou sa fèt souvan nan endistri sa, si ou pa avanse se bak wap fè. Nan sans sa, BlackBerry se yon aparèy ki te fokis sou pèmèt moun li imel fasil fasil lè yo nan lari. Si ou mete sou sa aspè sekirite òdpòt sèvis lan te founi, aparèy la te solid epi li te mache tout tan.

Mwen vwala, nan peyi oksidantal yo (sitou Ozetazini) moun vinn pa vle fè imel fasil fasil sèlman ankòi. Yo vinn vle navige sou web la epi fè yon dividal lòt bagay ak telefòn yo.

Se lè sa BlackBerry vinn rate tren-an menm si sèvis la toujou trè popilè sou rès planèt la (jan nou wè sa an Ayiti, pa egzanp)

Petèt sitiyasyon sa-a ta dwe yon leson pou Apple pou li evite pran pozisyon sa nan 5 osnon 10 an ki ap vini la yo.

Dayè semèn sa, konpayi foto Kodak deklare fayit. Li te deside rete nan pelikil lè tout moun tap anbake nan foto dijital. Jodi-a li, kòm ki dire, mouri nan fim lan.

Sak ta di sa.

Pou Koneksyon, sete Harold

Mèsi Harold

……………

Otorite Repiblik Dominikèn anonse pral gen Entènèt san fil pwochènman nan metwo Santo Domengo. Nan twa estasyon metwo a, ap gen òdinatè fiks tou ki pèmèt pasaje yo navige.

………….

Epi, sa m pataje sou kont Twitter ak Facebook mwen semèn sa a :

- 6 mwa prizon pou jounalis dominiken Johnny A. Salazar pou “difamasyon” ak poutèt, dapre tribunal la, li joure yon avoka atravè yon radio kominotè epi sit Entènèt. RSF denonse abi lajistis dominiken.

- Twitter te kab pèmèt yo detekte epi kontwole pi vit epidemic kolera a an Ayiti. Se sa k soti sou yon blog nan Youphil.com. Referans sou kont Twitter ak Facebook mwen.