> Kreyòl > Machwè gonfle anndan PNH

Ayiti-Polis

Machwè gonfle anndan PNH

Polisye ap plenyen pou move tretman

Publié le mardi 14 février 2012

Machwè gonfle anndan polis la, espesyalman nan 22zyèm pwomosyon an, kote polisye ap plenyen pou move tretman yo di yap sibi nan men alatèt enstitisyon an.

Dapre sa Radyo Kiskeya aprann nan bon ti mamit, polisye sa yo ap tann jouk kounye a yo peye yo 7 mwa frè espesyal pou manje a, yo dwe yo.

Yon lòt pa, yap mache 2 bra balanse depi yo sòti nan Lekòl polis la, nan lane 2011. Yo pa gen zam pou defann tèt yo zizoka, devan bandi ki yo menm gen tout kalte zam.

Pa gen yon semenn, yo rele yo pou ba yo revòlvè kalib 38, alòske PNH fenk resevwa pistolè 9 milimèt ki ta dwe pèmèt yo reyaji pi byen nan sitirasyon difisil.

Revòlvè 38 la pa sanble gen anpil fanatik anndan polis la. Dapre sa kap di, pa gen katouch pou revòlvè sa a. Anpil fwa, bal pou zam sa a konn ap vann 150 goud grenn, nan mache nwa.

Polisye kap bougonnen yo gen lòt pwoblèm ankò : anpil nan yo
pa gen bon jan idantifikasyon kòm polisye. Se inifòm lan sèlman ki ta montre yo se manm PNH la.

Polisye yo ki pa ka ni manifeste, ni pwoteste nan laprès, atire atansyon sou sitirasyon difisil yap viv. Yo mande pou alatèt yo panche sou ka yo. [jmd/Radyo Kiskeya]