> Kreyòl > Komisyon ankèt espesyal sou nasyonalite prezidan an remet paspò yo bay (...)

Dosye nasyonalite prezidan an rive nan yon lòt etap

Komisyon ankèt espesyal sou nasyonalite prezidan an remet paspò yo bay relijyon pou lapè

Paspò prezidan Martelly yo tounen al jwen li

Publié le jeudi 15 mars 2012

Komisyon ankèt espesyal sou nasyonalite sena repiblik la remèt manm platfòm relijyon pou lapè yo 8 paspò prezidan Michel Joseph Martelly yo. Senatè Jean-Baptiste Bien-Aimé manm komisyon ankèt la remèsye relijyon poulapè pou inisyativ yo te pran pou te pèmèt komisyon an genyen nan men l’ dokiman vwayaj prezidan-an, nan objektif pou rive fè limyè pou konnen si li gen yon lòt nasyonalite.

Senatè Bien Aimé fè konnen, komisyon an rankontre anpil ka iregilarite nan paspò prezidan Martelly, yo te remèt yo, pami ka sa yo, li site youn nan paspò yo nimewo 7 la ki gen 33 paj aloske tout paspò se 30 paj yo gengnen ak nimewo seri yo ki pa koresponn, li estime ki kontrè ak lwa sou imigrasyon. Senatè INITE a depatman Nodès la deklare komisyon an ap travay pou remet yon rapò kòrèk ki reflete sa yo jwenn nan dokiman yo.

Ann tande senatè Jean Baptiste Bien Aimé nan mikwo Vilner Joseph :

Monseyè Jean Zaché Duracin, evèk legliz episkopal ki fè pati delegasyon platfòm relijyon pou lapè ki ta l pran paspò prezidan Martelly nan sena-a deklare yap toujou rete disponib pou tout enstitisyon nan peyi a chak fwa yo fè apèl ak yo pou ede yo rezoud yon pwoblèm ki poze ant yo. Monseyè Jean Zaché Duracin, fè konnen platfòm nan déjà kontakte la prezidans kopi kat rezidans lan komisyon ankèt la ta swete jwenn pou yo kapab mennen ankèt la.

Li fè remake platfòm nan antan ke enstitisyon moral pa gen pouvwa pou fòse chèf leta a ba yo kat rezidans lan. Monseyè Duracin deklare demach pou te konvenk chèf leta a pou l pran desizyon sa a pat fasil paske, selon sa li di, te gen yon konfli ant 2 pouvwa yo.

Pastè Sylvain Exantus, prezidan federasyon pwotestan Dayiti ak paste Clément Joseph reprezantan misyon legliz Dayiti, deklare platfòm nan prè pou fè tout enstitisyon Ayisyèn yo chita pale chak fwa gen yon kriz ki menase peyi a, yon fason pou popilasyon an kapab konnen yon demen miyò. LPP/HI/RK