Doktè Jean-Michel Guérin mouri ansasinen Petyonvil

dimanche 3 juillet 2005,

Doktè Jean-Michel Guérin, yon medsen ayisyen anpil moun konnen, mouri anba bal ansasen lakay li nan katye Pegivil, nan Petyonvil, nan lannuit samdi pou louvri dimanch dapre sa radyo Kiskeya aprann.

Doktè a te kouri soti al gade lè l te tande yon bri toupre kay la. Men, apèn Jean-Michel Guérin te parèt deyò a bandi ame ki sanble te an paviyon maske te mete men sou li, epi fòse l antre nan chanm li kote yo te tou tire l.

Tout moun nan kay la te tèlman fremi devan espektak mabyal sa a, yo te kouri al kache kay vwazinay pou yo menm tou, yo pat viktim anba men ansasen yo. Yo jwenn yon grenn sandal Doktè a nan lakou lakay li, pandan anpil kesyon ap poze sou sa ki kache dèyè kò ansasinay sa a.

Jean-Michel Guérin vin lonje lis medsen ayisyen ki viktim nan ensekirite ki derape nan peyi a depi kèk ane e ki pran yon dimansyon san parèy pandan dènye tan sa yo. Pami lòt Doktè kriminèl touye yo, nou kapab site Jimmy Lalanne, yon jèn medsen yo te tire nan klinik li, Yvon Toussaint ki te Senatè tou an menm tan, Ary Bordes, pi gwo ekriven sou medsin ann Ayiti ak Jean Verly, ansyen minis sante piblik ak kolonèl nan ansyen Lame Dayiti.