> Kreyòl > Teworis ansasinen jounalis Jacques Roche

Teworis ansasinen jounalis Jacques Roche

Dèy ak endiyasyon toupatou ; yon teknisyen Tele Haïti libere gras ak entèvansyon lapolis

Publié le vendredi 15 juillet 2005

Jounalis enpi powèt ayisyen Jacques Roche mouri sasinen a laj 43 zan, anba bal malveyan ki te kidnape l depi dimanch pase nan Pòtoprens. Y al jwenn kadav konfrè a ak tou bal dèyè tèt li, nan do l, minote de bra dèyè, jedi maten nan Dèlma 4 (nan nò kapital la), yonn nan zòn ki sou kontwòl gwoup ame patizan anjandre Aristide yo. Yo jwenn li kouche sou do sou beton an tankou nenpòt bandi, ak yon bout chòt ble sou li, san chemiz, pye atè, nan mitan yon rigòl san.

Apre lapolis te fin idantifye kadav la yo te transfere l nan mòg lopital jeneral.

Jacques Roche ki se kouzen ansyen Premye minis Rosny Smarth, ki te avèk Prezidan René Préval soti 1996 pou rive 1998, te reskonsab seksyon kiltirèl jounal Le Matin pandan l t’ap travay tou kòm jounalis spòtif nan radyo Ibo, yon stasyon prive nan kapital la. Apre l te fin fè yon premye eksperyans televizyon nan chèn prive TELEMAX, defen an te vin ap anime depi plizyè mwa, yon emisyon sosyete sivil la ki konn pase sou antèn divès radyo ak televizyon nan peyi a. Bandi yo te gentan touche 10.000 sou 250.000 dola ameriken yo te egzije pou lage li. Depi dimanch yo t’ap plede repwoche Roche dèske li ta ap travay pou 184 la, alòske se yon kontra pwofesyonèl li te siyen ak gwoup la pou reyalize yon seri emisyon.

Premye minis Gérard Latortue anonse jedi swa nan Pòtoprens, gouvèlman an pral pran tout dispozisyon ki nesesè pou l jwenn ansasen jounalis la ak kole yon fren sèk nan aktivite kriminèl yo ki mete peyi a an boulvès. Minis kilti ak kominikasyon an, Magalie Comeau Denis, lonje dwèt li dirèk dirèk sou ansyen diktatè a Jean-Bertrand Aristide kòm vrè lòtè lanmò Jacques Roche la.

Nan jounal Le Matin, nan radyo Ibo ak nan près ayisyèn nan an jeneral, tout moun tèt anba. Pati politik yo, gwoup 184 la ak òganizasyon dwa moun yo kondane krim nan ak tout fòs yo enpi reklame jistis rapid rapid pou viktim nan. Sineyas ayisyen Raoul Peck, yo konnen anpil sou sèn entènasyonal la, rann "teworis lavalas yo reskonsab krim nan" pandan li anonse Aristide wè pa wè lajistis ap genyen pou l ba li santans li.

Yon lòt pa, yon operasyon direksyon santral polis jidisyè (DCPJ) mennen jedi maten, nan zòn Solino (nan lès kapital la) pèmèt liberasyon Jacques Berlince Elysée, yon teknisyen chèn televizyon prive Tele Haïti, yon ti tan apre yon ekip anjandre te fin kidnape l nan Nazon (nan mitan vil la) pou fòse l bay lajan anba gwo menas lanmò.. Pandan operasyon DCPJ a, 2 nan bandi yo tonbe anba katouch dapre alatèt DCPJ a Michael Lucius.