> Kreyòl > Inondasyon Senmak : 10 moun mouri, 500 fanmi sinistre

Inondasyon Senmak : 10 moun mouri, 500 fanmi sinistre

Siklòn Emily rale kò l sou Ayiti

Publié le samedi 16 juillet 2005

Pou pipiti 10 moun mouri neye, 500 fanmi sinistre akòz gwo dlo inondasyon ki anvayi vil Senmak 2 fwa, jedi ak vandredi swa, dapre pòtpawòl pwoteksyon sivil la Dieufort Deslosges. Se lapli Emily pote ki reskonsab inondasyon sa yo malgre siklòn nan rale kò l sou Ayiti nèt, depi nan lannwit vandredi pou louvri samdi lè l t’ap pran direksyon Jamayik ak gòlf Meksik pou li.

Pòtpawòl la fè konnen pwoteksyon sivil fè yon premye entèvansyon deja nan Senmak, pou l kapab pote moun ki sinistre yo sekou. Otorite yo ap travay tou ak patnè tankou Lakwawouj, misyon Nasyonzini an (MINISTA) pou lòt entèvansyon kapab fèt. Ministè travo piblik transpò ak kominikasyon dwe pote kole ak meri Senmak la prese prese, pou fè tout travay ki nesesè pou anpeche lòt inondasyon rive nan menm vil la.

Pòtpawòl pwoteksyon sivil la ki presize gen lòt enfòmasyon y’ap ranmase pou fè bilan egzat dega yo, pwomèt pou lendi kou biwo ouvè, ministè finans debloke lajan pou ride fanmi moun ki mouri yo ak sila yo ki sinistre.

Apre Dennis ki te lakòz, senmenn pase a, yon senkantèn moun te pèdi lavi yo, 20 te blese, plizyè dizèn te disparèt e 15.000 lòt moun te sinistre, fwa sa a se Emily ki kraze Senmak alòske siklòn nan ki pat menm prevwa pou zòn sa a, egzante Ayiti pou li al ratibwaze zile Jamayik nan basen Karayib la.