> Kreyòl > Ayiti nan pwogram Gwoup Rio a

Ayiti nan pwogram Gwoup Rio a

Publié le dimanche 17 juillet 2005

Minis afè etranjè 18 peyi Amerik latin ak Kominote Karayib la (KARIKOM) ki manm Gwoup Rio a ap genyen pou yo panche sou ka Ayiti a nan yon reyinyon y’ap fè, lòt wikenn nan, nan vil Buenos Aires, ann Ajantin. Chèf diplomasi peyi sa yo ladan yo Brezil, Ajantin ak Chili ki ap jwe yon wòl enpòtan depi plis pase 1 an, sou plan politik ak militè ann Ayiti, pral reflechi pou wè kouman sitiyasyon an kapab stabilize nan Peyi a. Sendomeng fè pati Gwoup la tou.

Nan menm rankont sa a, minis yo ap pale sou pi bon plan ki ta kapab genyen pou rebati ekonomi ayisyèn nan ki kraze nèt, anba tout soukous kriz politik ak vyolans san bout gwoup patizan ame Jean-Bertrand Aristide yo. Dirijan yo ap pwofite tou prepare gwo rankont chèf leta ak chèf gouvèlman tout 18 peyi Gwoup Rio yo ap fè 25 ak 26 dawout k’ap vini an, nan vil Bariloche, zòn Patagoni toujou ann Ajantin.

14 peyi KARIKOM yo, san Ayiti, te prezante divès pwopozisyon nan dènye asanble jeneral OEA a an Florid, pou yo te mande òganizasyon Eta ameriken yo veye demokrasi a toupatou sou kontinan ameriken an, men yon fason diferan de plan Etazini genyen pou rejyon an.

Depi kèk jou, non Ayiti toujou sou lis tout reyinyon enpòtan ki ap fèt sou sèn entènasyonal la ; men san reyalite a sou teren an pa chanje pou yon pwèlyèm.