Avoka Yvon Neptune ak Jocelerme Privert pa okouran grèv grangou mesye yo

Publié le vendredi 25 février 2005

Mèt Ephésien Joassaint avoka Yvon Neptune ak Jocelerme Privert deklare li pa okouran 2 kliyan l’ yo ta deklannche grèv grangou depi yo tounen nan Penitansye Nasyonal la

Mèt Ephésien Joassaint avoka ansyen Premye minis lavalas la Yvon Neptune ak ansyen minis enteryè a Jocelerme Privert fè radyo Kiskeya konnen, li pa okouran de enfòmasyon ki fè kwè, 2 ansyen gwo dirijan lavalas yo ta tanmen yon grèv grangou, depi lè yo te tounen nan Penitansye Nasyonal la dimanch maten.

Mèt Joassaint pat vle di ki dènye fwa li te gen kontak ak 2 prevni yo, ki gen sou do yo akizasyon moun ki ta dèyè masak Lasiri a, ki te lakòz yon senkantèn moun te pèdi lavi yo an fevriye 2004, sou Aristide, nan vil Senmak.

Kèk medya lavalas te kouri anonse Neptune Ak Privert ta deklannche yon grèv grangou, pou pwoteste kont kondisyon yo nan prizon an ki ta vin malouk, apre yo te fin chape poul yo samdi pase, pandan yon operasyon kòmando.